Issumik illuliamik Sisimiuni nassaarneq qanga inuit qanoq inooriaaseqarsimanerannut paasisaqarfiusut
Itsarnisarsiuut arlallit qaammat kingulleq ulapipput.
Sisimiunimi Narsanguami Sømandshjemmip allilerneqarnissaanut sanaartorneq sioqqullugu assaapput.
Tassanilu issumit illuliap toqqavianik arlaleriarluni illuliorfigineqarsimasumik nassaarput.
Issumik illuliap toqqaviata pisoqaassusaa itsarnisarsiuut suli qularnaanngilaat, toqqaviulli siullermik 1770-ikkunni illuliorfiusimanissaa, toqqaviullu kingorna ukiut 100-t 150-illu akornanni atorneqarsimanissaa ilimagaat.
Itsarnisarsiooq, assaanermillu ingerlatsisoq Kirstine Møller taama oqaluttuarpoq.
- Iggavimmi atortussianik marraasunik Tuluit Nunaanni 1858-imi sanaajusunik nassaarnerput soqutiginarnerpaavoq. Taassuminnga nassaarnerput tupaallaatigisorujussuuara, Kirstine Møller oqarpoq, nangillunilu.
Nassaarineqartut Sisimiuni niuernermi attaviit 1800-kkunni qanoq innersut pillugit paasisaqarfiusinnaapput.
Nunarput Danmarkimit taamani nunasiaataagami nunanit allaneersunut nunatsinnukarnissaminnut Danmarkimi oqartussaasunit akuersissuteqanngitsunut matoqqavoq.
- Aamma kridtimik Skotlandimi, Tuluit Nunaanni Hollandimilu pujortaatiliat nassaaraagut. Danmarkimi kridtimik pujortaatiliat 1600-kkunnit 1800-kkunnut namminneq sanasarmatigit, tamanna soqutiginarpoq, taamaattunillu tamaani nassaarnerput tupaallaatigaara, Kirstine Møller oqarpoq.
1771-imit aningaasaq
Itsarnisarsiuut aamma inuusamik siniffiup ataani nassaarput. Inuusaq qisummit qiperugaavoq qajartaqarsimagunavissorlu Kirstine Møller isumaqarpoq.
Aamma 1771-mit aningaasamik taamani nalilerujussuarmik nassaarput.
- Itsarnisarsiorneq inunnut tunngassuteqarmat, inuup aningaasaq una katassimassagaa tamannalu ajuusaarutigisimassagaa takorlooruminarpoq, Kirstine Møller oqarpoq.
Arferup qimerluata saarnga issiavittut atorneqarsimasoq
Taamani inuit tuttunik, puisinik arfernillu nerisarsimasut itsarnisarsiuut uumasunit saaniinik aamma nassaaminnit takusinnaavaat.
Itsarnisarsiuut arferup qimerluata saarnganik iggaviusimasumi aamma nassaarput. Taanna issiviattut atorneqarsimarpasippoq.
Itsarnisarsiuut nassaavi inuit taamani qanoq inooriaaseqarsimanersut paasisaqarfiusut, Kirstine Møller oqarpoq.
- Nassaarisagut inuit qanoq inuuneqarneri silarsuullu sinneranit qanoq sunnerneqarneri pillugit oqaluttuarisaanerup assigiinngisitaartuinik paasisaqarnissamut atorneqarsinnaapput, Kirstine Møller oqarpoq.
