Ivik Nielsen nerrivimmi arsaararnermi kalaallini siullerpaalluni DM-imi ujaminnattoq

Ivik Nielsenip unammineq juulliluunniit aalajangertariaqarsimallugit, DR-imut oqaatigaa.

Allattoq Hanna Vestergaard Hviid

decembarip 27-at 2022 14:06

Nutserisoq Connie Fontain

Nunatsinni nerrivimmi arsaarallaqqissut ilaat, 24-nik ukiulik Ivik Nielsen Sisimiuneersoq Roskildemi decembarip 22-ani DM-imi ajugaaniutivinnermi sølvinnappoq.

Ajugaaniutivinnermi unammeqatinilu Martin Lund Nielsenilu marlukkaarnermi unammipput.

Ivik Nielsen taamaalilluni kalaallini siullersaalluni nerrivimmi arsaararnermi Danmarkimi pissartanngorniuttoqarnerani sølvinnaqqaartuuvoq.

AAMMA ATUARUK Nikolaj Coster-Waldau nerrivimmi arsaararnermi GM-qataavoq

Unammersuarnermi ajugaaniutivinnissamut anngunnissani ilimagisimanngikkaluarinni, Ivik Nielsen nuannaaqaluni KNR-imut oqarpoq.

- Nuannersuaarpoq, taama angusaqarnissarput takorloorsimanngikkaluarparput, Ivik Nielsen oqarpoq.

Ivik Nielsenili Martin Lund Nielsenilu maanna danskini pikkorinnerpaamit Anders Lindimit unammeqataaniillu nunanut allanut unammisartumit Thor B. Christensenimit ajorsartinneqarput.

Ajugaaniutivinneq imaluunniit angerlamut juullisioriarnissaq

Ivik Nielsenili ajugaaniutivinnissamut ulloq ataaseq sioqqullugu nunatsinnut angerlarnissamut billetseqaraluarpoq, taamaammat taassuma ilaquttami juullisioqatiginissaat imaluunniit Danmarkimi pissartanngorniutivinnissaq aalajangertariaqarsimavaa. Tamanna DR-imut oqaatigaa.

- Aalajangernissaq uannut artornalaarpoq, kisianni peqataanera siulliullunilu kingulliusinnaavoq, taamaammat maaniiginnarpunga. Pissartanngorniutivinnermut peqataanani angerlamut juullisioriarnissaq toqqarsimagukku peqataaffiginngitsuugassaq annertuallaarpoq, Ivik Nielsen DR-imut oqarpoq.

Taamaammat taassuma angerlamut billettissani decembarip 27-anut nuutsippaa. Taanna ullumikkut angerlassaaq ilaquttanilu juullisioqatigalugillu ujaminnattaaminik nalliuttorsiutiginnissaaq.

Nutaarsiassami kukkunermik nassaarsimaguit uunga allaffigineqarsinnaavugut.