Jerry Laisa: Qilaatersortartoqatinik naapeqateqarneq uummatikkut pisuunnguallannaqaaq
Nuummi sapaatip akunnerani uani Katuami Katuarpalaaq ingerlanneqarpoq. Qilaatersortartorpassuit ataatsimuualaarneranni.
Aaqqissuussineq arfininngornermi marsip 26-ani naggaserneqartoq. 26-nik ukiulimmit Jerry Laisamit puigunaatsorsiarineqarpoq.
Nunavummi qilaatersortartut ikitsuaraallutillu qilaatersorsinnaanerat killeqarpoq. Tassami qilaatersortartutoqqat ikiliartortillugit ilitsersuisussat killeqartartut, 26-nik ukiulik, Jerry Laisa oqaluttuarpoq.
- Qilaatersortartorpassuit naapisimaarlugit uummatikkut assut nuannaarpunga, misigisaq nuanneqaaq.
Naggueqatigiit Alaskamiit, Nunavummiit, nunatsinneersullu qilaatersortartut Nuummi sapaatit akunnerani uani pikialaartitsipput.
Inukitsoq Sadorana 1990-ikkunnili qilaatersortalerpoq.
Taamaaliornerli Avanersuarmiumit qilaatersortartumik aamma puigunaatsorsiuffiusoq, Inukitsoq Sadorana oqaluttuarpoq:
- Qilaatersortaleramali nunatta iluani angalasarnikuuvunga, soorunami tamakku aamma puigunaattaqaat. Kisianni qilaatersortartoqatinnik soorlu avitseqatigisinnaasannik paaseqatigisinnaasannik amerlasuunik naapitsillunga oqaloqateqarlunga misigisaq aatsaat taamak qamuuna pisuunnguallannartigisoq misigaara.
Pikialaartitsineq marsip ulluisa 21-aniit marsip ulluisa 26-ata tungaanut Nuummi kulturip illorsuani Katuami ingerlanneqarpoq.
AAMMA ATUARUK Canadamiu Keenan aataqqiiminit kingornussivoq: Qilaatersornerup immikkuullarissunngortippaatigut
Pannertoormiup inngeriaatsit qilaatersoriaatsillu tammatsaaliorneqarnissaat nammineerluni ernumagisarsimavai, aggerfimminit ileqqutoqqat atorneqarneri annikeqimmata. Taassumali naggueqatini Nuummi naapikkamigit ernumanini milliallattoq KNR-imut oqaluttuaraa.
- Maaniinninni paasivara inngeriaatigut eqqarsaatigalugit assigiissuteqartorujussuulluta. Soorlu uumasut aallaavigalugit inngerusiorneq aamma Kalaallinit atorneqartorujussuusoq paasigakku assut nuannaarpunga, kisimiittutullu misigisimajunnaarlunga.
Jerry Laisa 13-inik ukioqarluni qilaatersortalerpoq.
- Uagut Nunavummi uumasut ilaarlugit qiteriaaseqartarpugut, tunutsinni qilaatersortoqarnerani. Taava Kalaallit Nunaanni qilaatsersorlutik inngeraangamik aamma uumasunik aallaaveqarlutik inngertarput.
Jerry Laisap Nuummi qilaatersortartoqatini naapisimaarneri sivisunerussasoq nammineerluni kissaatigigaluarpaa.
Qilaatersorneq UNESCO-p allattorsimaffiani kulturikkut kingornussassatut eriagisarialittut ukioq kingulleq decembarip qaammataani allattorsimasuutinut ilanngunneqarpoq.
