Umiatsiaararsortut pisassanik niuernatik attartortalerusuttut
Aalisarneq pillugu Ataatsimiititaliarsuaq Qeqertarsuup tunuani, Uummannami Upernavimmilu sinerissap qanittuani umiatsiaararsorlutik qaleralinniartunut allannguuteqarnissamik siunnersuuteqaterpoq.
Sinerissap qanittuani umiatsiaaqqamik qaleralinniat paggallutik, pisassiissutit ataatsimut ullumikkut aalisarpaat. Tassa qaammammut pisassat aalajangersimasut nungunnisaasa tungaanut aalisartarlugit.
AAMMA ATUARUK Aalisarnermut ataatsimiititaliaq: Akitsuutit isertitaqaalluartarput
Tamannali aalisarnermut ataatsimiititaliarsuup allanngortikkusullugu siunnersuutigaa. Ullumikkutummi paggalluni qaleralinniartoqassappat ukiut tallimat qaangiuppata inuussutissarsiutigineqarsinnaajunnaassasoq ataatsimiititaliarsuup inerniliuppaa.
Taamaattumik aalisartut namminneq niuerutigisinnaasaminnik pisassaateqalernissaat angorusuppaa.
SQAPK: Pisassat niuerutaasinnaassanngillat
Sinerissap Qanittuani Aalisartut Piniartullu Kattuffiatali, ataatsimiititaliarsuarmut ilaasortaasup, siunnersuut ikinnerussuteqarlutik oqaaseqarfigalugu isumaqatiginngilaat, niuerutaasinnaanngitsunillu pisassiisoqartalernissaa angorusullugu.
Umiatsiaararsortut immikkut pisassinneqartassasut katuffik isumaqarpoq. Taakkuli niuerutiginerisigut taarserneqarsinnaasanngillat. Aalisartummi akunnerminni pisassiissutinik attartorsinnaanissartik kissaatigaat.
- Pisassiissutit niuerutaannatik taamaattorli aalisartut akunnerminni attartorneqarsinnaassasut, aammalu aalisarnermik pisortaqarfimminngaanniit aqunneqartut siunnersuutitut tunniunnikuuagut, Erik Lange oqarpoq.
SQAPK-p niuerutigineqarsinnaasunik qaleralittassiisoqaraluarpat, sinerissap qanittuani aalisartut ukiut arlaqanngitsut qaangiuppata ikittuararsuanngorsinnaanerat ernummatigigamiuk attartorneqarsinnaasunik pisassiisoqartalernissaa kissaatigaa.
- Aalisartut ataasiakkaarlutik pisassinneqassappata umiatsiaaqqat kinguaariit ingerlaneranni kinguaariit ikittuaqqat ataaseq, marluk pingasulluunnit immaqa ingerlaneriinnaani pisassiissutit ullumikkut qaleralinniarsinnaanermut akuersissutit 1120-pput sineriak tamaat. Kinguaariit ikittuaqqat ingerlaneranni ukunani raajarniutitut kilisaassuartut amerlatigiinnalersinnaaneralluunniit ernumanartorujussuuvoq.
KNAPK: Niuerutaasinnaasut kiffaanngissuseqarnarnerussapput
Qaleralittassiissutilli attartorneqarsinnaanatik niuerutaasinnaassasut Kalaallit Nunaani Aalisartut Piniartullu Kattuffiat isumaqarpoq.
Taamaaliornikkut aalisartoq tunitsivinnut aningaasaliisunulluunniit attuumassuteqarani kiffaanngissuseqarluni aalisarsinnaanngussasoq KNAPK isumaqarpoq.
- Taava taakkua nammineq pigisarigamigit aningaaserivinni imaluunniit allatut taarsigassarsinermigut qularnaveeqqutigisinnaavai. Maannakkullu umiatsiartaarniartarnermi aningaasaateqaraluarlutilluunniit amigaatigisartagaat tassatuaagami ilaatigut qularnaveeqqutit, Henrik Sandgreen oqarpoq.
AAMMA ATUARUK Aalisarnermut ataatsimiititaliarsuaq: Politikerit pisassiissuteqartarunnaassapput
Pisasseeriaaseq qanoq ikkumaarnersoq Inatsisartut aalisarnermut inatsimmik suliaqalerunik aalajangissavaat.
Aalisarnermut Naalakkersuisoqarfik naapertorlugu aalisarnermut inatsisissaq Inatsisartut aappaagu ukiakkut ataatsimiinneranni siusinnerpaamik saqqummiunneqassaaq.
