Jyllandip avannaani eqqakkanik sullissiviup nunaminertaani arnaq toqungasoq nassaarineqartoq
Pingasunngornermi nalunaaqutaq 09.41 Nordjyllands Politiivi kalerrisaarneqarput nunatami eqqakkanik sullissiviup pigisaani arnaq toqungasoq nassaarineqartoq.
Kingornatigut politiit sumiiffimmi Aalborg Øst-imiittumi qanoq pisoqarsimaneranik misissuipput. Pingasunngornermi ualikkut Nordjyllands Politi tusagassiuutinut taama nalunaaruteqarpoq.
Arnap timaa toqungasoq Reno-Nord-ip nunaminertaani Troensevej 2 9220 Aalborg Østimi nassaarineqarpoq. Aamma Nørresundby-mmi najugaqarfimmi politiit suliaqarput, nalunaaqutaq 14.00-ip kinguninnguatigut nalunaarutigineqarpoq.
- Toqusoqarneranik misissuineq aallartipparput suna toqussutaasimanersoq paasiniarlugu, politikommissæri misissuinermilu pisortaq Carsten Straszek tusagassiuutinut nalunaarummi oqarpoq.
Immaqa arnaq kalaaleq
Nalunaarutigaa arnaq kalaaliussangatinneqartoq 40-t 65-illu akornanni ukiulik. Kisianni arnaq suli kinaassuserneqanngilaq. Taamaattumik ilaqutaasut suli nalunaarfigineqanngillat.
Misissuinermi nalunaaquttap akunnerini siullerni politiit qularnaatsumik suli paasinngilaat arnaq ajunaarnikkut pinnani toqusimanersoq.
- Taamaattumik-una arnamik nassaarnermi pissutsit sukumiinerusumik misissorivut, Carsten Straszek politiit nalunaarutaanni oqarpoq.
Reno-Nord-ip inunnit suliffeqarfinnillu eqqakkat kommuninit ukunannga Hjørring, Brønderslev, Jammerbugt, Mariagerfjord, Rebild aamma Aalborg suliarisarpai.
Siusinnerusukkut politiinit misissorneqarpoq
Nunaminertap suatungaani arnaq nassaarineqarsimanersoq tusagassiuutinut nalunaarummi takuneqarsinnaanngilaq.
Aamma nalunaarutigineqanngilaq kina politiinut sianersimanersoq imaluunniit kina toqungasumik nassaarsimanersoq.
Nordjyllands Politi tusagassiuutinut nalunaarummi allappoq suliamut allanik paasissutissateqarnatik. Aamma Ritzau oqaaseqartitsinissamut iluatsitsisimanngilaq.
Reno-Nord Aalborgimiittoq aamma politiinit februaarimi takusarneqarpoq. Taamani Mia Skadhauge Stevns-ip tammarneranut atatillugu takusaapput.
