Kalaallit Atuakkiortut peqatigiiffiiata saqqummersitsisarfiit ukkatarerusuppaat
Kalaallit atuakkiaat pitsaassuseqarluarpat?
Kalaallit Atuakkiortut peqatigiiffianni siulittaasoq taama aperivoq, taakkumi oktobarip 29-iani isumasioqatigiissitsiniarlutik soqutinnittunut qaaqqusipput:
- Soorunami pingaaruteqarpoq, kalaallit atuakkiaasa pitsaassuseqarluarnissaat, kialluunniimmi pitsaassuseqanngissuseq toqqarusunnavianngilaa, Kalaallit Atuakkiortut peqatigiiffiani siulittaasoq Juaaka Lyberth KNR-mut oqarpoq.
AAMMA ATUARUK Kalaallisut atuakkiat nersornaasiinissamut piukkunneqartut
Kinguaariit nikinnerat
Peqatigiiffiup taama aperineranut peqqutaavoq, atuakkamik saqqummersitsisartut amerliartuinnartut ataasiakkaatut saqqummersitsisaleriartormata, tamatumunngalu peqqutaavoq saqqummersitsisarfitoqaalersut saqqummersittakkaminnik appartitsiartulermata.
Juaaka Lyberth erseqqissaavoq atuakkanik saqqummersitsisarfiit nutaat soorlu Arctic Media aammalu Iperaq piummata taakkuli atuakkanik amerlasoorpassuakkaarinnillutik saqqummersisinnaanngillat.
Taamatuttaaq atuagaarniarfik Atuagkat saqqummersitsissaarnikuuvoq. Akunnattumillu angissusillit soorlu Milik Pubilishing aammal Maanuup Atuakkiorfia tigooraanissaminnut utoqqalinertik pillugu killeqalerput.
AAMMA ATUARUK Kalaallisut atuakkiat tuluttuunngortinniarneqalerput
Atuakkiortut saqqummersitsisartunit ikiorneqarneq ajorput
Atuakkanik saqqummersitsisarfiusimasup Atuakkiorfiup 2009-mi matunerata kingorna, atuakkiortut atuakkamik saqqummersitsiniarnermini ikiortissamik saaffissaaruttut, Juaaka Lyberth oqarpoq.
- Tamatuma kinguneraa, inuit saqqummersitsisarfimmik saaffissaqannginnertik pillugu namminneq saqqummersitsisalermata, oqarpoq.
- Tassalu imaappoq, saqqummersitsisarfiup ikiuinissaralui pinngitsoortarpaat, soorlu atuakkiaq aaqqissuisumit misissorneqaqqaarneq ajorpoq, grafiikerimik ikiorneqarneq ajorpoq, aammalu siammarterneqarneranut tuniniarneranullu ikiorneqartaratik.
- imarisamigut, grafikkimigut, aaqqissorneqarnermigut allatigullu pitsaanerujussuusinnaagaluarput, oqarpoq.
AAMMA ATUARUK Kalaallisut atuakkiat tapiiffigineqarsinnaapput
Pisortat saqqummersitsisarfiutaanik pilersitsisoqarsinnaava?
Kalaallit Atuakkiortut peqatigiiffiata isumasioqatigiissitsinissaminut qaaqquai soorlu Nunatta atuagaateqarfia, Grønlandica, atuakkanik tuniniaasartut aammalu kultureqarnermut naalakkersuisoq.
- Atuakkanik saqqummersitsisarfeqarnissaq isumasioqatigiinnissami qitiussaaq, qanoq iliorsinnaavugut tamatuma tungaanut? pisortat aqutaannik saqqummersitsisarfimmik pilersitsisoqarsinnaava? taamaassappat suut pisariaqarpat? aap aarlaqaqaat oqaluuserisassagut, Kalaallit Atuakkiortut peqatigiiffianni siulittaasoq Juaaka Lyberth oqarpoq.
