Kalaallit pingasut Ruslandimut iseqqusaanngillat
Kalaallit pingasut Ruslandimut iseqqusaanngitsut allattorsimaffianni allassimasuutigineqarput.
Ruslandip nunanut allanut naalakkersuisoqarfia ippassaq tallimanngornermi taama nalunaarpoq.
Taamatuttaaq Savalimmiormiut pingasut, Islandimiullu qulingiluat aammalu Norgemiut 16-t Ruslandimut iseqqusaanngitsutut allattorsimaffimmi allassimasimapput.
Russit nunanut allanut naalakkersuisoqarfia naapertorlugu, russit taama iliornerminnut tunngavilersuutigisimavaat, Ukrainemi sorsunneq peqqqutaalluni EU assigiinngitsorpassuartigut Ruslandimut mattussuimmat.
Inuilli kikkut Ruslandimut iseqqusaannginnersut allassimasoqanngilaq, pineqartulli soorlu Inatsisartuni ilaasortaapput, Naalakkersuisunut ilaasortaallutik imaluunniit inuussutissarsiornernut atatillugu aallartitaallutik ilisimatusarnermulluunniit attuumassuteqartuullutik, tassa pisortatigoortumik inuit saqqumilaartuullutik.
- Tassa, inuit russinut illuatungiliuttut russinullu isornartorsiuerpalaartumillu nunarput Rusland pillugu politikkikkut tutsiuttartut matumani pineqarput, ilaatigut taama nalunaarummi allassimasoqarpoq.
AAMMA ATUARUK Radarit amerlanerusut pillugu immikkut ilisimasalik: Kalaallit Nunaata nakkutiginissaanut USA erinitsavippoq
Nunatsinniit nunanut allanut naalakkersuisoq Vivian Motzfeldt (S), KNR-mut oqarpoq nunatsinneersut aqqit pingasut kikkuuneri nalugini:
- Naamik ilisimanngilagut, oqarpoq.
Taassumattaaq russit taama iliornerat tupaallaatiginngilaa:
- Eqqarsariarpunga, uagut aamma nunat killiit iliuusaannut peqataanikuuvugut taamaammat taamatut peqataasimanerput illuatungilerlugu russit qisuariaateqarput, Vivian oqarpoq.
Taamatut pisoqarnera ernumassutigisariaqarparput?
- Nunarsuarmi massakkut pissutsit singunnersimanarput aammalu ernumanarput aammalu killiffik tamatta allatorujussuaq isikkoqassasoq kissaatigigaluarparput, ullumikkullu nunat killiit Ruslandip iliuusaanut akerliullutik iliuuseqarput, massakkullu russiniit illuatungilerneqarlutik, taamaammat tupaallaatissarujussuartut taaneqarsinnaanngilaq, Vivian Motzfeldt oqarpoq.
Amerikamiut aamma nunatsinni radariliorusullutik tutsiupput taannalu imartami russinut Kinamullu alaatsinaatsutut inissinniarneqarpoq, taannami ernumassutigissavarput?
- Suliaq suli aalajangiiffigineqarnikuunngilaq, taamaammat suliaq aalajangiiffigineqarsimanngitsoq isummerfigissallugu pissusissamisoortutut isiginngilara, Vivian Motzfeldt oqarpoq.
