Kangerlussuarmi mittarfik pisortartaartoq – nunatsinni mittarfinni pisortat inuusunnersaraat

Mittarfeqarfiit Kangerlussuarmi mittarfimmi pisortassamik atorfinitsitsipput. Taann Ivaaq Christensenimik ateqarpoq, 33-narnillu ukioqarluni nunatsinni mittarfinni pisortani nukarlersaalerpoq.

- Ivaaq pikkorissunik misilittagaqqortuunik sulisoqarlunilu nammineq inuusukkaluaqaluni piginnasaqarluarpoq, taamaattumik Kangerlussuarmi mittarfimmi aquut tigujumammagu assut nuannaarpugut, Mittarfeqarfiini ingerlatsinermut pisortaq, Niels Grosen tusagassiuutinut nalunaarummi oqarpoq

Ivaaq Christensen MIttarfeqarfinni havnebetjentitut 2017-imi atorfinippoq. Qaammatillu pingasut qaangiutiinnartut mittarfimmi aqutsisunngorluni.

Taamani mittarfimmi pisortaasimasoq, Peter Høgh suleqatigalugu.

- Ilisimasakka tamaasa Peter Høghimit ilikkarpakka. Petermut qujassutissaqaqaanga. Taannaqarsimanngitsuuppat ullumikkut pisortatut atorfittaarsimasinnaanngikkaluarpunga, Ivaaq Christensen oqarpoq.

- Nunatsinnut isaariaattut Kangerlussuaq suliffigalugu nuannaralugu pingaaruteqartutut isigaara. Airgreenlandip timmisartui tikittarnerat saniatigut timmisartunit nunanit assigiinngitsunit tikeraarneqartarnerput assigiinngisitaartunik pissanganartunillu suliaqarnarpoq.

Ivaaq Christensen Sisimiuni peroriartorsimavoq politiitullu ilinniaqarsimalluni.

Taanna nukappiaqqanut marlunnut ataataavoq kisimiittoq, asimilu angalaarnermik nuannarisaqartuulluni.