Kattuffik Naalakkersuisunut: Sinniisut kannguttaatsuliornernut pinaveersaartitsinermut pingaaruteqarput

Aktieselskabit, tassa ingerlatseqatigiiffiit sulisunut sinniisoqarnissaminnik pisussaatitaasariaqaraluarput.

Sulisut assersuutigalugu nikanarsagaallutik tiinganiarfigineqartut sinniisuminnut saaffiginnissinnaasariaqarmata.

Atorfillit Kattuffiat politikikkut aaqqiinissamik Naalakkersuisunut kaammattuivoq.

- Isumaqatigiissuteqarfigiuminaakkamik. Taamaallaat ukununnga pisortat suliffeqarfiutaannut tunngatillugu sinniisoqarnissamut isumaqatigiissuteqarpugut, Dina Olsen oqarpoq. Taanna Atorfillit Kattuffiani siulittaasuuvoq.

AAMMA ATUARUK Kattuffiit: Suliffeqarfiit nikanarsaalluni tiinganiartarnerup ajoqutai ammasumik oqallisiginerusinnaasariaqarpaat

Aktieselskabit suliffeqarfimminni sulisunut sinniisoqarnissaannik piumasaqaateqanngilaq.

Tamannalu politikikkut allannguiffigineqartariaqartoq siulittaasoq isumaqarpoq.

- Soorunami kattuffittut saaffigisinnaajuaannaraluarpaatigut, kisianni pitsaanerpaasarami suliffeqarfimmi orneriaannakkaminnik saaffissaqarnissaq. Tassuuna illersuutaassammat aammalu iliuuseqariataarnissaq periarfissaassammat arlaannik eqqunngitsoqartillugu.

KNI-mi kannguttaatsuliortoqartartoq

Namminersorlutik Oqartussat ingerlatseqatigiiffianni KNI-mi pisortaanerusimasoq sulisunut arfinilinnut kannguttaatsuliorsimasutut eqqartuunneqaqqammertoq taassuma assersuutigaa.

Arnat eqqartuussinermi uppernarsaasutut oqaluttuarnerminni eqqaavaat, misillertarnertik pillugu suliffimminni saaffissaaleqisimallutik.

AAMMA ATUARUK Peter Grønvoldimit kannguttaatsuliorfigineqarsimasut: Ikinnerpaat inoqamminnik politiinut nalunaarutiginnikkusuttarput

Atorfillit Kattuffiata KNI-mi sulisunut sinniisoqanngitsut Dina Olsen oqarpoq.

- Piuminaappoq. Angorusupparput aamma anguniarparput ukiuni kingullerni. Soorlu assersuutigalugu KNI-mi sinniisoqalernissarput. Taavalu tunngaviusumik isumaqatigiissuteqarnissarput tassa ilaasortatsinnut illersuutaanissaa eqqarsaatigalugu, taanna oqarpoq.

Atorfillit Kattuffiata ilaasortami akornanni nikanarsaagaalluni tiinganiarfigitittoqartarnersoq siorna misissuiffigaa. Ilaasortat quliugaangata ataatsip killii qaangerneqarsimasut kisitsisit takutippaat.

SIK-p AK ilalerpaa

Dina Olsenip sinniisoqarnissamut piumasaqaataa nunatsinni sulisartut kattuffiini annerpaami SIK-mi siulittaasup isumaqatigaa.

- Suliffeqarfiit tamaavimmik sinniisoqartussaapput. Taamaattumik taama pisoqartillugu pingaaruteqarpoq sulisitsisumut imaluunniit sinniisumut nalunaartoqartarnissaa, Jess G. Berthelsen oqarpoq.

Dina Olsenip Naalakkersuisut aaqqiinissaat ujartorlugu saaffiginiarpai.

- Piginnittutut piumasaqarsinnaasariaqarput suliffeqarfiutitik sulisut kattuffiinik isumaqatigiissuteqarnissaat anguniassallugu, Dina Olsen oqarpoq.

Sammisaq pillugu Naalakkersuisut KNR-imit oqaaseqartinnissaat sulissutigaarput. Sulili iluatsinngilaq.