KNAPK piniartut ikiorseqqullugit qinnuteqarpoq, Naalakkersuisulli suli akinngillat
Avannaani aalisartut piniartullu ukiorlummit eqqugaasut, arlaleriarluta KNR-imit oqaluttuaraarput.
Taamaammat KNAPK nuna tamakkerlugu aalisartunut piniartunullu katillugit 415-inut immikkut ittumik ikiorseeqqullusilluni Naalakkersuisunut decembarip arfineq aappaanni allakkatigut qinnuteqartoq, KNAPK-p siulittaasua Nikkulaat Jeremiassen oqarpoq:
AAMMA ATUARUK Qaanaami piniartut aalisartullu ukiorlummit aamma eqqugaapput
- Tassa maangamut akineqanngilaq, taamaallaat tusagassiorfitsigut kommunimut innersuussineq tusarnikuuarput. Imaannanngitsorujussuuvoq taama amerlatigisunik ilaasortaqarluni kattuffimmi, minnerunngitsumillu nunatta sineriaani aalisartunik piniartunillu naalakkersuinikkut taama suusupaginninneq annertutigitillugu. Tassa imatut misinnarluni inuussutissarsiorneq taanna politikikkut illersorneerussimasoq.
Aalisartut piniartullu ikiorserneqarnissamik pisariaqartitsisut illoqarfinni nunaqarfinnilu makkunaniipput:
Qaanaaq, Siorapaluk, Qeqertat, Savissivik,
Upernavik, Kullorsuaq, Nuussuaq,
Kangersuatsiaq Upernavik Kujallerlu.
Ittoqqortoormiit. Tasiilaq, Isortoq, Tiniteqilaaq, Kuummiut Kulusullu.
Narsaq kiisalu Nanortalik nunaqarfiisalu ilaat Aappilattoq Alluitsup Paalu.
- Nunarput tamaat ataatsimut isigalugu sila annertoorujussuarmik unerisimanngippoq, inuussutissarsiornermi annertuumik eqquinerlulluni. Aammalu decembarip aallartisimalernerata tungaanut sikumi inuussutissarsiorniarneq eqqarsaatigalugu sila aamma annertoorujussuarmik innarliilluni. Taamaattumik Naalakkersuisunut ikioqquneq ingerlatinnikuuarput. Nikkulaat Jeremiassen taama oqarpoq.
2,075 mio. koruuninik pisariaqartitsipput
KNAPK Naalakkersuisunut allappoq piniartut aalisartullu 415-it katillugit 2,075 mio. kroruunit missaannik ikiorserneqarnissamik pisariaqartitsisut, taamaalilluni ikiorserneqartut ataasiakkaat 5.000 koruuninik taperserneqarsinnaaniassammata. A ningaasat amerlassusaat saaffiginnissimasut amerlassusaannik tunngaveqartoq Nikkulaat Jeremiassen oqarpoq:
-Immikkoortortaqarfiit nalunaartut namminneq aamma ajornartorsiorlutik, taakkua aallaavigalugit kisitsisit pissarsiarinikuuagut.
AAMMA ATUARUK Múte B. Egede: Kommuni suleqatigalugit piniartut ikiorserneqassapput
Naak KNAPK Naalakkersuisunut qinnuteqaanni pillugu suli toqqaannartumik akineqanngikkaluartoq, Naalakkersuisut siulittaasuat Múte B. Egede aamma Isumaginninnermut, Suliffeqarnermut, Nunamullu Namminermut Naalakkersuisoq Jess Svane KNR-imut oqarput, piniartut kommunimit ikiorserneqarniarunik suliffissarsiortutut nalunaassasut.
Aqqiissulli arlalinnit isornartorsiorneqarpoq, tassami politikerit, KNAPK ilaasortaasalu aaqqississut isornartorsiorpaat.
