KNR-ip toqqaannartumik aallakaatitsinerata ajutoornera Inatsisartuni attaviup ikkulluarneqannginneranik pissuteqartoq

Naalakkersuisut nutaat nalunaaqutaq ataatsimut taagorneqarneranni Inatsisartuni teknikkikkut ajornartorsiuteqarpoq.

KNR.gl-ikkut KNR tv-kkullu malinnaasoqarsinnaavoq – isiginnaaqataasulli tamarmik unammillernartoqarnera malugisinnaavaat.

Ajutooqqanera ima ajortigaaq allaat ataatsimiittarfimmit kalaallisut aallakaatitsineq aallaqqaataani nipeqarani. Tamatuma kingorna kalaallisuumit nutserneqarnera aallakaatinneqarunnaarpoq – piffissallu ilaani nikisinneqarlutik, taamaalilluni ataatsimiinnerup nutserneqarnera nalinginnaasumik nutserneqanngitsumik aallakaatitsisarfimmi aallakaatinneqarluni.

Tamanna Inatsisartut maanna siulittaasorisimasaata Hans Enoksenip qisuariaateqarfigaa.

- KNR-ip atortorissaarutaani ajutoorneruvoq, taanna oqarpoq.

Tamannali sallunerusoq, KNR-ip pisortaa, Karl-Henrik Simonsen oqarpoq.

- Inatsisartunuku namminneq atortorissaarutaanni ajutoortoqartoq.

Attavik ikkulluarneqanngitsoq

Taassuma oqarnera naapertorlugu ajornartorsiutaasoq innaallagiamut ikkuttartup ikkulluaqqannginneranik pissuteqarpoq. Ikkulluaqqanngitsullu aappaata Inatsisartut ataatsimiittarfiannit nipimi nassiutinngitsoortillugu kingornatigut nutserneqarnerata nipaa aamma katataatippaa.

Taamaappammi sooruna toqqaannartumik aallakaatitsisoqannginnerani atortorissaarutit misissorneqaqqaanngitsut?

- KNR-imit teknikerit Inatsisartuni teknikerit peqatigalugit atortorissaarutit tallimanngormat misissorpaat. AJunngitsumik ingerlapput. Taakku pinerit tamaasa nalinginnaasumik misissorneqaqqaartarput – ullumikkulli misissorneqaratik, Karl-Henrik Simonsen oqarpoq.

Toqqaannartumik aallakaatitsinerup ajutoornera paasineqarmat KNR-imit teknikerimik erngertumik Inatsisartunukartitsisoqartoq taassuma paasissutissiissutigaa.

- Taassuma kabelimik eqqortumik ikkusimasoqannginnera paasivaa. Taamaalillunilu nipaa ilaalerluni. Ataatsimiinnerli ingerlangaatsiareersimasoq, pisortaq oqarpoq.

- Hans Enoksenip oqarneratut KNR kukkussuteqanngilaq. Tamanna Inatsisartut atortorissaarutaanik ajutoornerusoq paasineqarpoq.

Naalakkersuisut nutaat taagorneqarneranik aamma illit takunninngitsoorsimaguit – taava una atuarsinnaavat.