Kommunip malittarisassanik paatsuuinera: Akiussuserneqanngikkuit uffarsinnaanngilatit

Killilersuutit nuna tamakkerlugu atuutilersinneqarmata, Kommune Qeqertalimmi nunaqarfiit ilaanni innuttaasut coronapaseqanngikkunik illu sullivinnukarsinnaajunnaarsinneqarput.

Nunaqarfinni Ikamiuni, Akunnaami Kitsissuarsunnilu illu sullivinni atisanik errorsiniaraanni, uffarniaraanni nunaqarfiullu allaffianut saaffiginninniaraanni coronapasseqasseqarnissaq piumasaqaataalerpoq. 

Paatsooqatigiinneq

- Tupaallappunga isumaluummerlungalu, nunaqqateqarpugummi kapitissimanngitsunik. Nunaqarfimmilu maani amerlasuut kuuinnartumik imeqanngillat, sapaatip akunnerini pingasuni tulliuttuni errorsinatillu uffarsinnaajunnaartut eqqarsaatigivakka. Taakkuullunimita qanoq ippa? Kitsissuarsummiu, Ida Mølgaard oqarpoq.

Ida Mølgård nammineerluni coronapaseqarpoq, nunaqqatinili coronapasseqanngitsut imermillu kuuinnartumik atueriaannaanngitsut pillugit nipangiinnarusunngilaq.

Kommunip akiuussuserneqarsimanngitsunut mattussinera killilersuutinut nalunaarummi oqaatsinik paatsoornermik pissuteqarpoq.

Coronapasseqanngitsummi innuttaasut illuinut assigisaannullu iseqqusaanngitsut tassani allaqqavoq.

Aammali allaqqavoq, pisortatut oqartussani pilersuiffiusunilu init sullissiviit, saaffiginnittarfiit ilaalu ilanngullugit iserfiginiaraanni coronapassimik takutitsinissaq piumasaqaataanngitsoq. 

Uffaqqissinnaalersut

Kommune Qeqertalimmili borgmesterip illu sullivinni atuiniaraanni coronapasseqaqqaarnissap atorunnaarsinneqarnissaanut nunatta nakorsaaneqarfianit immikkut akuersissummik pissarsillutik nalunaarutigaa.

- Amerlasuut kuuinnartumik imeqaratillu errorsisarfeqannginnamik imminni, taamaattumik illu sulliviit taakku eqqiluisaarnermut tunngatillugu aamma immikkut pingaaruteqartorujussuummata. Qujanartumillu paaseqatigiissutigineqarpoq akuerineqarlunilu, Ane Hansen oqarpoq.

Coronapasi ukunani takutissavat:

• Tamanit ornigarneqarsinnaasunukarniaraanni coronapassimik takutitsisoqassaaq. Tassa:
• Neriniartarfinni, cafeni, imerniartarfinni, qitigiartarfinni.
• Atuakkanik atorniartarfinni, kulturip illuanni, filmertarfinni, katersugaasivinni saqqummersitsisarfinnilu.
• Katersortarfinni allanillu innuttaasut ataatsimoortarfianni.
• Illup iluani silamilu eqaarsaartarfinni, soorlu timersortarfiit, naluttarfiit, timigissartarfiit arsaatarfiillu.
• Nujaleriffiit, tagiartortittarfiit, allallu assigisaat.

Ukunanili coronapas takutissanngilat: 

• Pisiniarfiit 
• Allakkeriviit.
• Mittarfiit
• Pisortatut oqartussani pilersuiffiusunilu init sullissiviit, saaffiginnittarfiit il.il. 
• Pisortat angallassissutaannut tunngatillugit utaqqisarfiit.