Kommuneqarfik Sermersooq: Atuartut pikkorissut pikkoriffitik aallunnerulissavaat
Kommuneqarfik Sermersuumi meeqqat atuarfiini tamani atuartunut pikkorilluinnartunut pikkorissartarfik aappaagumiit pilersinneqassasoq kommunalbestyrelsemi partiit tamarmiusut marlunngormat akuersissutigaat.
Misiliutitut suliniummik ukioq manna aallartitsisoqassaaq, meeqqallu atuagarsornikkut, assassornikkut pilersitsisinnaassuseqarnikkullu pikkoriffillit pikkorissartarfittaassaanni misilittakkat atorneqassapput.
Kommunalbestyrelsemut siunnersuutigineqartumi ilaatigut allaqqavoq atuartut suliatigut pikkorilluinnartut matumani pineqartut tassaasut "atuartitsissutit iluani fagimi ataatsimi arlalinniluunniit immikkut pikkoriffillit, taakkulu pikkoriffiisa eqeersaavigineqarnerisigut nukittorsaavigineqarnerisigullu, kajumissuseqarlutillu piumassusillit, immikkut iliuuseqarnermikkut/periarfissinneqarnermikkulluunniit fagini ingerlalluarnissaminnik periarfissinneqarsinnaasut."
Kommunalbestyrelsemi Inuit Ataqatigiit, Demokraatit aamma Suleqatigiissitsisut siunnersuuteqartuupput.
Taakku kissaatigaat kommunimi meeqqat atuarfiini tamani atuartunut suliatigut pikkorilluinnartunut neqeroorutit assigiiaartut pilersinneqarnissaat. Atuartitsinerullu nalinginnaasup saniatigut pikkorissartitsisoqartassaaq.
Siunnersuut naapertorlugu pikkorsissartarfissat kommunimi illoqarfiit atuarfiini pilerseqqaarneqassapput.
- Nunaqarfinni atuartut fagini pikkorilluinnartut taamaalillutik periarfissinneqassapput taakku Nuummi Tasiilamiluunniit illoqarfiit atuarfiini angajullerni atuarnerminni pikkorissaavinni peqataanissaminnut, siunnersuummi allaqqasoqarpoq.
Atuarfiit ataasiakkaat aalajangiisassasut
Atuarfiup aqutsisui ataasiakkaat ukiumi atuarfiusumi tulliuttumi atuartunut suliatigut pikkorilluinnartunut pikkorissaavimmik pilersitsinissamut pisariaqartitsisoqarnersoq naliliisassapput.
Atuarfiillu ataasiakkaat pikkorissaavinni perorsaanermut ilikkagaqarnissamullu tunngasut najukkaminni pissutsinut tulluarsaasinnaanissamut periarfissaqassapput.
Akullerni aamma angajullerni atuartunut illoqarfiup atuarfiani atuartunut immikkut atuaqatigiiaraliortoqarsinnaavoq tamarmik amerlanerpaamik aqqaneq-marlunnut inissalimmik.
Nunaqarfimmi atuarfik atuaqatigiiaraliornissamik kissaateqassappat, taava atuarfimmi akullernut atuaqatigiiaraliortoqarsinnaavoq amerlanerpaamik atuartunut arfinilinnut inissalimmik, atuaqatigiiaqqanullu ataatsinut ilinniartitsisoq ataaseq attuumassuteqassaaq.
Neqeroorullu tamakkiisumik illoqarfiit atuarfiini tamani atorneqaruni ukiumi atuarfiusumi ataatsimi 480.000 koruninik naleqassasoq kommunip missiliorpaa.
Nunaqarfinni atuarfiit arfineq-pingasut tamarmik pikkorissaaviinnik tamakkiisumik atuissappata ukiumi atuarfiusumi ataatsimi 215.000 koruuninik naleqassasoq missiliuunneqarpoq.
Kommunalbestyrelse pikkorissaaviliornissamut aningaasartuutissat tunngatillugu immikkoortitsinikuunngilaq taamaattumillu aningaasartuutissat kommunimi politikerit 2023-mut missingersuutit isumaqatigiinninnialerpata nassaarineqassapput.
