Kunngi Charles inatsisartunut: Anaanama maligassiuisuunera malinniarpara
- Inatsisartut tamat oqartussaaqataanerannut pingaaruteqartuuvoq, kunngi Charles tuluit inatsisartoqarfianni ataasinngornermi oqalugiarnermi oqarpoq.
Tuluit kunngiata Charlesip naalakkersuisoqarfimmi naatsumik oqalugiarnermini dronning Elizabethip maligassiuinera nunallu naalakkersuinikkut iluarsaanneranut atatillugu pisussaaffinnik tamanik malinninniarluni oqaatigaa.
- Shakespearep dronning Elizabeth pillugu oqarnikuuneratut dronningi prinsinut inuusunut tamanut maligassiuisuuvoq, Charles Elizabeth I-imut (1533-1603) anaanagigaluaminullu innersuussuteqarluni oqarpoq.
AAMMA ATUARUK Dronning Elizabeth toqusoq
- Inuusuttuulluni nunaminut innuttaasuminullu kiffartuussisussanngorpoq, tamat oqartussaaqataanerani naalakkersuinikkut iluarsagaanermi tunngaviit naleqartut attanniarlugit uppernarsaavoq, Charles inatsisartut dronningip septembarip arfineq-pingajuanni toquneranut misiginneqatiginninnerannut ilassinninnermini oqarpoq.
Kunngip Charlesip illut oqaluttuarisaanermut attuumassuteqartut Big Benilu oqaluuserai.
- Big Benip nalunaaqutarsua inuiaqatigiinnitsinnut nunarsuarmi tamarmi ilisarnaataalluarput, kunngi Charles oqarpoq, siarngullu napasuliarsua anaanaminut atsiussaasoq eqqaallugu.
- Maani saassinni nikorfaninni oqaluttuarisaanerup pingaaruteqassusaa misigisinnaavara, tamanna inatsisartoqarfinni ilaasortat uatsinnut tamanut iluaqutissanik suliaqarluarniarneranni inatsisartut ileqqutoqaani nukinnut eqqaassutissaavoq, Charles oqarpoq, tamatuma kingorna qinikkat inuiattut erinarsuut atorpaat.
AAMMA ATUARUK Charles III Tuluit Nunaanni kunngitut ivertinneqarpoq
Tuluit Nunaanni dronningip novembarip 19-iani, ataasinngornermi ilisaanerata naammassinissaata tungaanut nunami tamarmi tamanna pisortatigoortumik aliasuutigineqassaaq.
Kunngi Charles dronningi Camilla peqatigalugu “Operation Spring Tide”-p ilaatut Edinburghimukassaaq. ”Operation Spring Tide” kunngip inuiaqatigiinnut sisamanut – tassa Tuluit Nunaanni, Skotlandimi, Walesimi Nordirlandimilu angalaqqaarneranut taaguutaavoq.
Charlesip Edingburghimi Skotlandip ministeriunera, Nicola Stugeon Holyroodhouse-imi naapissavaa. Tamatumalu kingorna Skotlandimiut inatsisartui naapissavai misiginneqatiginninnerannillu ilassinnilluni.
