Kunngikkormiup kalaaleq illussanik titartaasartoq nersornaaseraa
- Tunniusimalluartuuvoq. Kalaallit illuutaannik kingornussanik allanngutsaaliuinermi suliniuteqarluarlunilu oqaluttuarisaanermi illut siunissami attanneqarnissaanik qulakkeerinneqataavoq.
Prins Joachim nersornaammik Prins Henriks Europa Nostra Prisimik Inge Bisgardimut tunniussinermini kalaallit kulturikkut kingornussaanik qulakkeeriniarluni suliaqarnera pillugu taama oqarpoq.
Nersornaaserneqartorlu Nuummut uteqqinneranit ullualuit qaangiuttut KNR-imit naapinneqarami tulluusimaarlunilu nuannaarpoq:
- Nunatsinni suliamut piginnaasaqarninni kisimiingaatsiarnikuuvunga, taamaammat nersornaaserneqarnera angisoorujussuuvoq. Suli iluamik upperisinnaavallaanngilara. Suliaqarfigisartakkanni nersornaat una malunnaateqarnerpaavoq. Taamaammat iliuuseqarluarsimallunga malugineqarsimasorlu maanna paasivara.
Inge Bisgaard Nunatta katersugaasivia Allagaateqarfialumi ulluinnarni sulisartoq taama oqarpoq.
Suliaralugit kusassarneqassanngitsut
Naatsumik oqaatigalugu Inge Bisgaardip nunatsinni illuutit allanngutsaalisariaqartut paarinissaat suliarisarpaa, illut taamaalillutik oqaluttuarisaanertik katassanngimmassuk.
Assersuutigalugu nunatsinni illu pisoqaanerpaaq, Hans Egedep Illua aserfallatsaaliorneqarsinnaanngitsunik plastikkinik igalaasersorneqaruni taava illup oqaluttuarisaanermi ilaa annaassavaa, kinguaariillu tulliisa illup piffissamit qangameersuunera paasiuminaatsissavaat.
Piniartut illuaraat uuttortarneqarpoq. Assi: Nunatta Katersugaasivia Allagaateqarfialu
Taamaammat oqaluttuarisaanermit illuutitta paarinissaat pingaaruteqartoq, Inge Bisgaard isumaqarpoq:
- Illuliornermi kulturitta kikkuunersugut takutittarpaa. Illumimmi paarinnilluarutta takussutissiissaagut. Taarsiiginnarutta illup ilisarnaatini annaassavaa soqutaajunnaassallunilu. Soorlu inuit kusassarniarlutik suliariteqattaarpallaartut.
Inge Bisgaardip kalaallit ukiut 4.500-it matuma siornanit ullumikkumut illuliortariaasaat ilisimatusarfigisimavaa.
Taassuma oqarnera naapertorlugu misilittakkat ileqqutoqqallu kinguaariinnut qanoq ingerlaqqissimanerat takuneqarsinnaalluarpoq, assersuutigalugu illut issittorsuarmut issittup silaannaanut naleqqussarlugit qanoq ilusilersorneqarsimanerat.
Illutoqqat oqaluttuarisaanerput oqaluttuarigaat
Illut oqaluttuarisaanitsinnik oqaluttuarinnissinnaanerat nunatta avannaata kangiani ilaatigut misigineqarsinnaavoq, tassanimi illut 350-it missaanniittut ilisimatusarnerup nalaannut atassuteqartut, ilisimasassarsiortut nunarsuup assingani qaqortunik kingullernik ersarissaaniarlutik ornittagaanni takuneqarsinnaapput.
Aamma norgemiut piniartut illuaraat mikisoq kalaallit nalunaarasuartaaseriffiatut siullertut atorneqarsimasoq Sorsunnersuup Aappaatalu kingorna qimaannarneqarsimasoq attorneqaavinngitsoq nassaassaavoq.
- Radiomut atassuteqarnermut assiliornermullu ullumikkut atukkatsinnut atassuteqarneranut oqaluttuassartaqarpoq, Inge Bisgaard oqarpoq.
Danmarkshavnimi illu. Assi: Nunatta Katersugaasivia Allagaateqarfialu
Illoqarfinni nunaqarfinnilu illunik Kalaallit Nunaata oqaluttuarisaaneranik oqaluttuassartaqangaatsiartut aamma nassaassaapput.
Inge Bisgaardip Nuummi Nuutoqqami illutoqqat ilaatigut erseqqissaatigai:
- Illoqarfiit kisarfissagissaartumi tulaffissagissaartumilu aamma anorersuarmut oqquuffiusinnaasuni inissinneqakkajussimapput. Tamakku taamani pingaaruteqarluinnarput. Taamaammat illoqarfinni umiarsualiviit ullumikkut qitiupput. Umiarsualiit illoqarfimmut illoqarfimmiillu aqqutaapput.
Prinsi: Perruualaarsinnaavutit!
Danskit tusagassiorfii naapertorlugit Pris Joachim kajumissuseqarluarluni Inge Bisgaardimut nersornaasiivoq.
Prinsi nersornaasiinermi Inge Bisgaardimut ima oqarpoq ”Perruualaarsinnaavutit”.
Nersornaaserneqartup taamaaliornissi unammillissutigissavaa:
- Pikkoriffigivallaanngilara. Kisianni imaassinnaavoq ilaatigut taamaaliortassasunga.
Europa Nostra allanngutsaaliuineq pillugu peqatigiiffiit kulturikullu eriagisassanut atatillugu suliniaqatigiiffiit Europami nunanit 40-nit amerlanerusuneersut ataatsimoorfigaat.
Prins Henrik Europa Nostrami 1990-imit 2007-imut tassani præsidentiuvoq, Prins Joachimilu Prins Henriks Europa Nostra Prisimi sernissortaalluni.
Assi: Nunatta Katersugaasivia Allagaateqarfialu
