Múte B. Egede: Nunarput Islandilu arlalitsigut assigiiffeqarmata suleqatigiinnerussaagut
Nunatta Islandillu akornanni suleqatigiinnissamik isumaqatigiissut Naalakkersuisut siulittaasuata Múte B. Egedep Islandillu ministeriunerata Katrín Jakobsdóttirip ippassaq atsioqatigiissutigaat.
Nunarput Islandilu assigiinngitsutigut qangali suleqatigiissuteqareerput.
Taamaammat maanna suleqatigiinnissamik isumaqatigiissuteqarlutik, Mute B. Egede KNR-imut oqarpoq.
- Kalaallit Nunaata Islandillu nunatut sanileriittut inuusaatsikkut avatangiisitsinnik inuuniuteqarluta assigiiffeqarluarlutalu suleqatigiiffissarpassuaqarpugut.
AAMMA ATUARUK Nunarput Islandilu suleqatigiinnissamik isumaqatigiittut
- Aammalu nunatta nunamik ataasiinnarmik niuernermut aallaaveqarani kisiannili nunanik allanik aamma suleqateqarluni ineriartornissaa pissusissamisoormat isumaqatigiissusiorpugut, Múte B. Egede oqarpoq.
Isumaqatigiissut qulequttanik pingaarnersiukkanik arfineq marlunnik imaqarpoq, tassalu: Niuerneq, aalisarneq, aningaasaqarnikkut suleqatigiinneq, naligiisitaaneq, ilinniartitaaneq ilisimatusarnerlu aammalu kulturikkut suleqatigiinneq.
Island nunarpullu aalisarnikkut aningaasarsiortuupput. Tassuunakkullu suleqatigiinneq pitsanngorsarneqassasoq aamma atsioqatigiissutigineqarpoq.
- Aalisarnermi aalisagaqatigiit imartatsinniittut naapertuilluarnerusumik aammalu siunissami kinguaassatta aamma aalisartuarnissaannik qulakkeerinninniarneq, niueqatigiinnikkut annerusumik suleqatigiinneq tunngavilerneqarpoq massakkut siunissami ineriartortinneqarluartussatut, Naalakkersuisut siulittaasuat oqarpoq.
- Ilinniartitaanikkut inerisaanissatsinnik immitsinnut isumassarsiorfigaluta inerisaqatigiilluta. Ilisimatusarnikkut ilisimasaqarnerulerneq. Pingaarnertullu nunatta namminiilivikkiartuinnarnerani nunanik allanik aamma suleqateqarsinnaaneranik takutitsineq.
Islandimiut nunatsinni Nuummi inissisimaffilimmik 2013-imili sinniisoqarfeqarput, Namminersorlutillu Oqartussat Islandimi illoqarfiit pingaarnersaanni Reykjavikkimi sinniisoqarfimmik 2018-imili ammaapput.
