Macron, Scholz Draghilu Ukrainemut tapersersuinertik takutinniarlugu Kyivimiittut

Tysklandip forbundskansleria Olaf Scholz, Frankrigillu præsidentia Emmanuel Macron, Italiamilu ministeriuneq Mario Draghi, Poleniminngaanniit qimuttuitsorlutik Ukrainep illoqarfiisa pingaarnersaannut Kyivimut ullumi sisamanngornermi tikipput. Frankrigip præsidentiata allattoqarfia taama ilisimatitsivoq.

- Europap Ukrainemik ersoqatigiinnera takutinniarlugu Kyivimiippugut, Macron Kyivimut tikinnermi oqarpoq.

Europami naalakkersuinikkut siuttut pingasut taakku Ukrainep præsidentianik Volodymyr Zelenskyj-mik ataatsimeeqateqassapput.

AAMMA ATUARUK Angela Merkelip russit tyskillu suleqatigiinnerat isornartoqarsorinngikkaa

Rusland Ukrainemik februaarip ulluisa 24-anni saassussimmalli, Europami nunat angisuut pingasut taakku naalakkersuinikkut siuttui Ukrainemut siullerpaamik tikeraarput.

Nunamik sorsunnermik eqqugaasimaqisumik russinullu akiuiniartumut tapersersuinertik takutinniarlugu tikeraarput.

AAMMA ATUARUK Nato sakkussianik sakkortuunik Ukrainemut nassiussinissamut kajumissaarisoq

Ukraineli Tysklandimik, Frankrigimik Italiamillu siusinnerusukkut isornartorsiuivoq. Nunammi pingasut taakku Ukrainemik toqqaannartumik tapersersuinissamut aallaqqaammut nangaassuteqarsimasut, Ukraine isumaqarpoq. Isornartorsiutilli taakku nunat pingasut siuttuisa maanna iliuuseqarfiginiarpaat.

Naalakkersuinikkut siuttut Ukrainemi sorsunnerup unitsinneqartariaqarneranik piumasaqaateqarnissaat Ukrainemi naalakkersuisut ernummatigaat, sorsunnerummi kingunerisaanik nunani tamalaani aningaasarsiorneq inuussutissanillu pilersuineq ilaatigut eqqorneqarmat.

Sakkussianik amerlanerusunik Ukrainemut nassiussisoqarnissaa Zelenskyj-p piumasarissagunaraa naatsorsuutigineqarpoq.