Maniitsumi uuliakoorneq tankimit nunap iluaneersumeerunarpoq
Maniitsumi qatserisartut Kangerloralammi dieselerujussuarmik uuliakoorneq piiarniarlugu suli ulappupput.
Qapuk immap qaavanut seqqartarpaat, uuliamullu milluaasinnaasumik atortoqarput. Ullulli arleraluartut suli pissutsit aaqqilluanngillat.
- Massakkut killiffigaarput, annertunerpaaffiusoq katersuiffigineruarput, annikinnerpaaffiusorlu ungooriffiginerulerparput, tassa suli katersorniarsaraarput atortorisinnaasagut atorlugit, Maniitsumi qatserisartuni aqutsisoq Qillaq Jørgensen oqarpoq.
AAMMA ATUARUK Maniitsumi atuartut dieselimik aniatitsisoqarneranit tipi pissutigalugu angerlartinneqartut
Taanna erseqqissaavoq ikuallattooratarsinnaanerup pilernissaanut innuttaasut annilaangassuteqartariaqanngitsut, dieselimi ikuallassaguni kissartorujussuusariaqarpoq, dieselilu maanna imaaniippoq kissartumiinnginnamilu ikuallassinnaanngilaq.
Maniitsumili innuttaasut cigaretsikuminnik imaanut igitsinnginnissaat qatserisartut kaammattuutigaat.
Manna tikillugu qularnaatsumik suli paasinngilarput uuliap aniasup suminngaanneersimanissaa, Qeqqata Kommuniani upalungaarsimanermi pisortaq Ole Kreutzmann KNR-mut oqarpoq, pasitsaassaqarpulli.
- Pasitsaassat ilagivaat, tankit nunamut assatat nunap iluaniittut sitserutilersimasut, tassami uulia kuuttoq nunap qaavani ersiinnartumeersimagaluarpat paasereersimassagaluaratsigu, Ole Kreutzmann oqarpoq.
Tipippallaarnera pillugu atuarfik matusariaqalersoq
Marlunngormat Maniitsumi atuarfik Kilaaseeqqami meeqqat atuartut angerlartinneqarput, uuliakoornermi atuarfimmut ungasinngitsumiippoq taamaalillunilu tipersuaq sualulluinnarluni.
Atuarfik Kilaaseeqqami pisortamut tullersorti KNR-mut oqaluttuarpoq, atuartut ilaat sulisullu ilaat tipersuarmik niaqorlulersimasut merianngulersimasullu, tipimi tamanna atuarfiup torsuusaani naamaneqarsinnaasimammat.
- Ulloq siulleq tikka assut sakkortuvoq, ullormi taanna silageqaaq seqinerlu kissarluni. Kisianni maanna tikka millivoq tassami uulia piiarlugu assoroqaluta ulapputigigatsigu, Qillaq Jørgensen oqarpoq.
Taanna oqaluttuarpoq, Maniitsumi innuttaasut tipimik sunnertissimasut, qatserisartulli sapinngisartik tamaat atorlugu uuliakoorneq piiarniarsaraat.
Atuarfik Kilaaseqqami atuartut ataasinngorpat aatsaat atuariartoqqissapput, aammalu 10. klassemi atuartut sapaatip-akunnerani matumani misilitsittussaagaluarnerat ataasinngorpamut kinguartinneqartariaqarsimavoq.
