Meeqqat misileraataasimasut tikeraarnissaannut Siumut avannaani akerliusoq
Meeqqat 1951-imi misileraataasimasut Avannaata Kommunianut misigisassarsiortinnissaat
Avannaata Kommuniani Siumumiit kommunalbestyrelsimi ilaasortat akerleraat.
Avannaata Kommuniani borgmesterip Palle Jerimiassenip tikeraarnissamut qaaqqusisuuvoq.
Meeraallutik misiliutigineqartut
Meeqqat 22-t 1951-imi misiliutaasussatut Kalaallit Nunaanniit Danmarkimut nassiunneqarput.
Meeqqat taakkua misileraanermi pingaarnertut inissisimapput, taamani meeqqat qallunaanngorsarneqarput maligassatut Kalaallit Nunaannut utersinnaaqqullugit.
Taakkuali angerlaramik kalaallisut oqalussinnaanngillat ilaquttaminnilu najugaqaqqusaanatik. Meeqqallu taamani Nuummi børnehjemmimi inissinneqarlutik.
Meeqqat 22-t sinneri arfinillit ullumi suli inuupput. Taakkua 80-it missaannik ukioqarput.
- Aningaasarpassuupput 120.000 koruunit ataatsimut isigalugit. Isumaqarpunga taakkua kommunitta iluani susassaqarfitsinnut atorutsigit pingaarnerpaajusoq, Sakio Fleischer oqarpoq. Taanna Avannaata Kommuniani borgmesterip tulliata aapparaa.
Meeqqat 1951-imi misileraatigalugit Danmarkimut aallartinneqarnikut Avannaata Kommuuniata tikeraartinniarpai.
Borgmester, attaviitsoq Palle Jerimiassen tikeraartitsinissamik isumassarsisuuvoq.
AAMMA ATUARUK Meeraallutik misileraatigineqarsimasut Ilulissanut misigisassarsioriartornissamut qaaqquneqartut
Kommunimiimmi misiginneqatiginninnermik takutitsinissamik oqaluttuarisaanermilu qanoq nalaataqarsimanertik oqaluttuarerusussappassuk, saqqummiinissaannut tikeraarnissaannullu periarfissiipput.
Utoqqatserneq taarsiinerlu
Ministeriuneq Mette Frederiksen qaammatip siuliani Københavnimi Nuummilu pisortatigoortumik utoqqatsissuteqarpoq, misileraatigineqarsimasullu sinneruttut tamarmik immikkut 250.000 koruuninik taarsiiffigitillutik.
Maannalu qaaqqussummik takkuttoqaqqippoq. Meeraanerminni misileraatigineqarsimasut arfinillit Avannaata Kommunianit Ilulissanut qaaqquneqarput.
Aningaasalli kommunimi iluani atorneqarsinnaagaluartut Sakio Fleischer isumaqarpoq.
- Assersuutigalugu, Avannaata Kommuniani utoqqaat pisariaqartitsisut arlaqarput. Aamma arlaatigut immaqa meeqqat inuusuttullu suliniaqatigiiffiini assigiinngitsunut aningaasat atorneqarsinnaagaluarput, taanna oqarpoq, nangipporlu:
- Una misiginneqatiginninneq takutinniarneqarpoq, kisianni uagutsinnut pingaaruteqarami kommuunitsinni innuttaasut salliutillugit iliuuseqassasugut.
Hingitaq 53-imut atorneqarsinnaasut
Avannaata Kommuniata misileraatitut pineqarsimasunut misiginneqatiginnissummik kommuni allakkamik tunniussaqaruni naammattoq taanna isumaqarpoq.
Taarsiullugu Pituffiup eqqaani Uummannamiit 1953-imi nuutsitaasut Avannaata Kommuniani angalatinnissaannut aningaasat atorneqarsinnaagaluartut taanna isumaqarpoq.
- Oqaluttuartinneqarsinnaapput taamanikkut nuutsinneqaramik inissaqaratilluunniit pineqarput. Tassa taakkua uagut aamma eqqarsaatigisinnaagaluarpagut kommuunitsinni angalatinneqarnissaat oqaluttuartillugillu, Sakio Fleischer oqarpoq, Uummannamiillu Qaanaamut nuutsitaanikut suliniuteqarfiginissaat eqqarsaatigalugu.
