Meeraallutik misileraatigineqarsimasut Ilulissanut misigisassarsioriartornissamut qaaqquneqartut
- Eva aatsaarluinnaq oqaluuteqqammerpara. Evalu Gabamut sianersimavoq. Taakku aamma perusupput, Kristine Heinesen oqarpoq, nunatsinnukarnissaminullu piareersimalluni.
Kristine Heinesen oqarasuaatikkut nuannaatsappaluppoq. Taanna, Eva Gaba allallu pingasut arfiniliullutik meeraanerminni misileraatigineqarlutik Danmarkimut 1951-imi aallartinneqarsimasut sinneraat.
Meeqqat taakkua misileraanermi pingaarnertut inissisimapput, meeqqammi qallunaanngorsarneqarnissaat siunertaavoq. Nunatsinnullu uterunik danskisut oqaluttunngorsimatinniarneqarput.
Misileraanerli iluatsinngilaq: Meerarpassuarnit 22-usunit amerlasuut kingunerluuteqarput, atornerluisuupput ataasiakkaallu imminnut toqoriarsimallutik.
Utoqqatserneq taarsiinerlu
Meeraallutik misiliutigineqartut
Meeqqat 22-t 1951-imi misiliutaasussatut Kalaallit Nunaanniit Danmarkimut nassiunneqarput.
Meeqqat taakkua misileraanermi pingaarnertut inissisimapput, taamani meeqqat qallunaanngorsarneqarput maligassatut Kalaallit Nunaannut utersinnaaqqullugit.
Taakkuali angerlaramik kalaallisut oqalussinnaanngillat ilaquttaminnilu najugaqaqqusaanatik. Meeqqallu taamani Nuummi børnehjemmimi inissinneqarlutik.
Meeqqat 22-t sinneri arfinillit ullumi suli inuupput. Taakkua 80-it missaannik ukioqarput.
Ministeriuneq Mette Frederiksen qaammatip siuliani Københavnimi Nuummilu pisortatigoortumik utoqqatsissuteqarpoq, misileraatigineqarsimasullu sinneruttut tamarmik immikkut 250.000 koruuninik taarsiiffigitillutik.
Maannalu qaaqqussummik takkuttoqaqqippoq. Meeraanerminni misileraatigineqarsimasut arfinillit Avannaata Kommunianit Ilulissanut qaaqquneqarput.
AAMMA ATUARUK Ilisimatooq meeraanerminni misileraatigineqarsimasunut utoqqatserneq pillugu: Oqaluttuarisaanermi pingaaruteqarluinnarpoq
- Tupaallaatigerujussuarpara, nuannersumik tupaallappunga. Maani sila siallerluni pikkunaaruttortoq Avannaata Kommunianit Ilulissanut qaaqquneqassamaartugut tusarlugu nuanneqaaq. Iliuusaat kusanaq. Isumagissiallannaqaaq, Kristine Heinesen Danmarkimit oqarasuaatikkut oqarpoq.
Qimusserneq
Meeqqat sinneruttut arfiniliusut Avannaata Kommunianit qaaqquneqarnissaannik borgmesteri, attaviitsoq Palle Jerimiassen borgmesteri isumassarsisuuvoq.
Kommunimiimmi misiginneqatiginninnermik takutitsissamik aammalu oqaluttuarisaanermi qanoq nalaataqarsimanertik oqaluttuarerusussappassuk, saqqummiinissaannut tikeraarnissaannullu periarfissiipput.
AAMMA ATUARUK Meeraalluni misiliutigineqarsimasoq: Ukiuni 70-inngulersuni angalaneq naalerpoq
- Kalaallit Nunaannut immaqa naggataaamik misigisassarsiortikkusullugit, taassumalu saniatigut aamma aaqqissuussamik ingerlataqarusulluta, Palle Jerimiassen oqarpoq.
Naak qaaqqussutit suli nassiunneqanngikkaluartut, tamanna meeraanerminni misileraatigineqarsimasut affaasa nuannaarutigaat.
- Maannakkuusinnaavoq, taava qimussersinnaassagaluarpugut. Aammali kingusinnerusukkuusinnaavoq. Ukiummi qanorilinera uannut apeqqutaanngilaq, Kristine Heinesen oqarpoq.
Avannaata Kommuniata tikeraartitsinissamut 120.000 koruuninik aningaasartuuteqassasoq naatsorsuutigineqarpoq.
