Meeraagallarami misiligutaasimasoq taarsiiffigineqarneq pillugu: Kukkunertik kiisami aatsaat nassuerutigaat
- Matuma siornatigut ukiorpassuanngormata kukkunerisamik aatsaat nassuerutiginera kiisami piffissanngorsimavoq.
Kristine Heinesen taama oqarpoq. Meeqqat misigutaasimasut amiakkuusut arfinillit ilagaat.
Meeraallutik misiliutigineqartut
Meeqqat 22-t 1951-imi misiliutaasussatut Kalaallit Nunaanniit Danmarkimut nassiunneqarput.
Meeqqat taakkua misileraanermi pingaarnertut inissisimapput, taamani meeqqat qallunaanngorsarneqarput maligassatut Kalaallit Nunaannut utersinnaaqqullugit.
Taakkuali angerlaramik kalaallisut oqalussinnaanngillat ilaquttaminnilu najugaqaqqusaanatik. Meeqqallu taamani Nuummi børnehjemmimi inissinneqarlutik.
Meeqqat 22-t sinneri arfinillit ullumi suli inuupput. Taakkua 80-it missaanni ukioqarput.
2020-mi danskit ministeriunerat Mette Frederiksen Danmark sinnerlugu siullerpaamik "meeqqanut misigutigineqartunut" pisortatigoortumik utoqqatserpoq.
Massakkullu kalaallinut suli inuusunut arfinilinnut koruuninik 250.000-inik utoqqatserneq malitseqarpoq.
Kristine Heinesen oqaluttuarpoq sapaatip akunnera kingulleq tallimanngornikkut eqqartuussissuserisuminit paasitinneqarsimalluni.
- Sivisuumimmi artornartumillu akiuunnerusimavoq. Kisianni nuannaarutigaara massakkut nassuerutigimmassuk, kukkunermik kingornatigut ukiorpassuit qaangiummata,oqarpoq.
Utoqqatserneq pingaarnerpaavoq
Inuit taakku arfinillit danskit naalagaaffiat eqqartuussisunut tunniussinerisa kingornatigut taarsiisoqarpoq, tassani isumaqaramik 1951-imi Danmarkimut nuutinneqarnertik tassaasoq ilaatigut inuttut inuunissaraluaminnik ilaquttaminnillu inooqateqarnissaraluaminnik narrunarsaaneq.
1951-imi meeqqat kalaallit 22-t ilaquttaminnit peersinneqarlutik Danmarkimut umiarsuarmik nassiunneqarnerat danskisut perorsarneqarnissaat siunertaralugu taarsiiffigineqarnermut tunngaviuvoq. Siunertarineqarpoq kalaallit siuttut danskisut oqaluttut pilersinneqarnissaat, taakkulu Kalaallit Nunaaata ineriartornera iluaqusissavaat.
Meeqqat taamani sismat qulingiluallu akornanni ukioqarput. Kisianni arlaannaalluunniit ilaqutaaminnut utinngilaq. Taarsiullugu Kalaallit Nunaannut meeqqat illuannut ilaqutarsianullu inissinneqarput.
AAMMA ATUARUK Meeraagallarami misiligutaasimasoq taarsiiffigineqarneq pillugu: Rødviinni pitsavik iggisigisariaqarpara
Kristine Heinesen oqaluttuarpoq taarsiiffigineqarnissani pingaarnerutissimanagu, akerlianilli pingaarnerpaatissimallugu utoqqatserfigineqarnissani.
- Ilakka allat sinnerlugit aamma nuannaarpunga, tassami aamma taarsiiffigineqarusukkamik, uannut aningaasat pingaarnerpaanngillat, pingaarnerpaaq tassaaavoq utoqqatserfigineqarnissaq. Maaniikkunnaartut aamma eqqarsaatigaakka, ajoqaarmi ulloq angisooq nassuerutigiginninnermik nalunaarfik misiginngimmassuk, oqarpoq.
Aningaasat Kalaallit Nunaannukarnissaminut atussamaarpai.
- Isumaliorpunga aasaq manna Nuummukarniarlunga, sivisoorsuarmimmi tassaniinnikuunngilanga.
