Meloni tatiginnikkunnaarnermik taasititsinermi siullermi tapersersorteqarluartoq

Ukrainemut tapersersuinertik attatissallugu Ruslandimullu pillaatitut iliuutsitik atuutinnassasut, Italiap ministeriunerata neriorsuutigaa.

Allattoq Ritzau

oktobarip 26-at 2022 08:40

Nutserisoq Mads Lynge

Italiami naalakkersuisunngorlaanut inatsisartut aappaanni tatiginnikkunnaarnermik marlunngornermi unnukkut taasititsisoqarmat naalakkersuisut ajugaapput.

235-t Giorgia Melonip naalakkersuisoqatigiivi nutaat akuersissutigaat, 154-it akerliusut.

Melonip Deputeretkammerimi taasititsissutigineqarnermi ajugaanissaa ilimagineqareerpoq. Melonip partiia naalakkersuisoqataalu allat inatsisartuni amerlanerussuteqarput.

Italiami Sorsunnersuup kingulliup kingorna partiit aatsaat taama talerperliuniartigisut Giorgia Meloni siuttoralugu naalakkersuisoqatigiilerput.

AAMMA ATUARUK Macron, Scholz Draghilu Ukrainemut tapersersuinertik takutinniarlugu Kyivimiittut

Taassuma partiia, Fratelli Italia, Italiami inatsisartunut qaammatip ataatsip matuma siornatigut qinersinermi partiit talerperliit akornanni annerpaanngorpoq.

Melonimut tatiginnikkunnaarnermik taasititsinerup tullia inatsisartut aappaanni Senatimi ullumi pingasunngornermi pissaaq.

Senatimi taasititsinissaq naammassiinnagassatut aamma isigineqarpoq, Melonimmi naalakkersuisoqataalu Senatimi aamma amerlanerussuteqarluarmata.

Nutaarsiassami kukkunermik nassaarsimaguit uunga allaffigineqarsinnaavugut.