Ministeri: Russit Khersonimi sakkutuuisa tunuarternerat minnerpaamik sapaatit-akunneranik sivisussuseqassaaq

Ruslandip Ukrainep kujasissortaani illoqarfimmi Khersonimi sakkutuuni tunuartinniarpai, tamannalu minnerpaamik sapaatit-akunneranik sivisussuseqassaaq.

Ukrainep illersornissamut ministeria Oleksii Reznikov taama oqarpoq.

Taanna nutaarsiassaqartitsivimmit Reutersimit apersorneqarnermini ilaatigut oqarpoq, russit sakkutuui Khersonimiittut 40.000-t missilioraat. Taakkunannga amerlasuut Khersonip illoqarfittaaniinngikkunik avatinnguaniipput.

- Sakkutuut taama amerlatigisut Khersonimit ullup ataatsip marlulluunniit ingerlaneranni tunuartinneqarnissaat ajornakusuussaaq. Minnerpaamik sapaatit-akunneranik sivisussuseqassaaq, Reznikov oqarpoq.

AAMMA ATUARUK Ukranemiut Khersonimi sakkortuumik saassusisoqassangatikkaat

Russit sakkutuui kuussuup Dniprop kimmut sineriaanit tunuartinneqarniartut, Ruslandip pingasunngornermi nalunaarutigaa.

Russit sakkutuuisa tunuartinneqartarnerini tamanna annertunerit ilaanniippoq.

Ukrainemi aamma ukioriariartulerpoq, russillu nunap immikkoortuanit tassannga tunuartiterpata sakkuaannerit annikilliartornissaat ilimagineqartoq, ministerip oqaatigaa. Illuatungeriit sakkutuuisa nutaamik immikkoortitersinnaanissaannut tamanna ammaassissaaq.

- Illuatungeriit sorsuffimmi sakkuaannitik ukiuunerani unitsissagunarpaat. Tamanut tamanna iluaqutaassaaq, unikkallartoqassaarmi, Reznikov oqarpoq.Ukrainemiut sakkutuui nukissaqarluarlutik piareersimallutillu ukioreerpat akiuuteqqilersinnaalersimassasut taassuma siulittuutigaa.