Mittarfittaassaq uuttortarneqarlunilu upalungaarsimasut sungiusarfigaat
Maanna sivitsortumik ulloq unnuarlu mittarfiliortut qannguluppalunnerat tusarsaasarpoq. Mittarfittaassammi aqqusinertaata affaa naammassisimaleriarmat angallannermik aqutsisoqarfiup misilittaaffigileruttorpaa.
Mittarfiummi affaa 930 meteritut takitigisoq miffigineqarsinnaanersoq ulluni sisamani misilittaaffigissavaat. KNR-ilu ulloq siulleq misilittaaffik peqataaffigaa.
- Mittarfik maanna atortup mittarfittaasamut kujasinnerusumiittumut nuunniarnera pissutigalugu misiliivugut, angallannermik aqutsisoqarfimmi teamlederi luftfartinspektørilu Casper Bruun Andersen KNR-imut oqarpoq.
Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngorlugit.
Tamatuma saniatigut Qaqortumi nunap iluani mittarfimmik nutaamik, 1500 meterimik, takissuseqartumik sanaartortoqassaaq.
Nuummi Ilulissanilu mittarfittaassat pilersaarutit malillugit 2024-mi miffigineqarsinnaalissapput.
Qaqortumi mittarfittaassaq pilersaarutit malillugit 2025-mi miffigineqarsinnaalissaaq.
Mittarfittaassami taama aatsaavissuaq sungiusartoqarpoq, innermik qamitsiniarneq qisuariarnerlu tassani sungiusaataallutik.
Timmisartormi milluni ikuallalissagaluarpat, upalungaarsimasut piffissap aaliangersimasup iluani takutereertussaapput qamisaajartorlutillu. Upalungaarsimasullu sungiusarnerat ajunngitsumik ingerlasimasoq, Casper Bruun Andersen oqarpoq.
- Upalungaarsimanermut sillimaniartut piffissaq eqqorlugu takupput, periuserlu atugaat ajunngilluinnartumik atorpaat. Soorlu biilit oqumigaarnartumi inissippaat. Kaari ikuallattoq skumkanonimik aamma qatsilertorpaat.
Assi: KNR
Mittarfittaassaq 2024-mi atoriaannaaleriarpat, mittarfik anginernik qatseruteqalissasoq, Casper Bruun Andersen oqarpoq. Massakkummi qatserutai timmisartunut Dash 8-nut qatserissutaapput, mittarfittaassarlu piareerpat timmisartorsuit mittalerpata angissusaanut tulluartunik qatserutitaassasut, taanna aamma oqarpoq.
- Upalungaarsimaneq ajunngitsumik ingerlanersoq iliuusissatut pilersaarutit annertusineqarnerisa kingorna aarlerinartoqanngilluinnarnersoq qulakkeerusukkatsigu taamaaliorpugut.
Mittarfittaassap naammassinissaanut misileraanerit 200-nit ikinnerunngitsut Danmarkimi angallannermi aqutsisoqarfimmit ingerlanneqassapput.
- Mittarfimmik ingerlatsinermut aserfallatsaaliinernullu pingaarutillit allarpassuit aamma misilerartussaavagut. Soorlu mittarfik siuliminit silinnerulerpoq, sweeperit, tassa ujaraaraajatit aputaajaatilluunniit qassit pisariaqarnersut, kemikaliat qanoq annertutigisut allallu soorlu mittarfiup qullii taartissamaatigineqassanersut misissussavarput, Casper Bruun Andersen oqarpoq.
Assi: KNR
Mittarfiup atulersinnaanissanut suna amigaataanersoq, angallannermut pisortaqarfiup, Mittarfeqarfiit Kalaallit Airportsillu misissorpaat.
Tamanna ingerlalluarsimasoq, Casper Bruun Andersen oqarpoq.
- Massakkumuugallartoq ingerlalluarpoq, kisianni aatsaat misissuilluta aallarteqqammerpugut. Annilaanganartoqanngikkallarpoq. Massakkumuugallartorlu qulakkeerlugu oqarsinnaanngikkallarpunga miffigineqarnissaanut piareeqqanersoq. Suli ullut sisamat misissuissaagut. Massakkut suli affaanulluunniit killinnginnatta oqaaseqarsinnaanngikkallarpunga, massakkumuugallartorli ingerlalluarpoq.
Mittarfissaq 2.200 meteritut takissuseqartussaq timmisartunit nunanit allaneersunit 2024-mi miffigineqarsinnaalissangatinneqarpoq.
