Naalakkersuisut: Juulli qanilliartorpoq, immissinnut paarigitsi

Juullikkunni ilaqutariinni ataatsimoortoqangajalerpoq.

Mianersoritsili, Naalakkersuisut siulittaasuat, Múte B. Egede (IA) coronamut killiffik pillugu tusagassiortunik katersortitsinermi oqarpoq.

- Misilittakkagut aallaavigalugit coronamik tuniluunneq sukkasoorujussuarmik ingerlasinnaasarpoq. Juulli aggerpoq, ullut nalaakkiartulerpagut ataatsimoorneq annertuumik nunatsinni taamaalilluta aamma atorlugu ilaqutariittut ataatsimoortussaavugut.

- Nunatsinnut angallatussat aamma nunatsinni iluani angallatussat amerlasoorujussuit juullip ullui qalliartormata maannakkut pigaluttualerput. Taamaammat kaammattuutigaarput mianersortoqartariaqartoq mianersoqatigiittariaqartugullu. Nunatta iluani angalagutta nunatta avataaninngaaniilluunniit tikikkutta tikeraartoqarsimaguttaluunniit mianersornissaq annertuumik tamatsinnut pisussaaffiliimmat.

- Taamaammat kaammattuutigeqqikkusuppara akiuussutissamik kapitinnissamut tamatta sapinngisamik peqataanissarput.

Múte B. Egede oqarpoq, coronavirusillu ilaat Omikron sukkasoorujussuarmik tuniluutilersinnaasoq oqaatigalugu.

Omikron juullikkunni anngussinnaasoq

Nakorsaanerup, Henrik L. Hansenip oqarnera naapertorlugu Omikron nunatsinni suli tuniluutinngilaq. Taamaakkaluartorli tuniluutilereersimasinnaasoq aamma nalilerpaa.

- Omikron nunatsinnut anngutereersimanngikkuni anguttussaavoq. Tuniluuttoq nutaaq pillugu akiuussutissamik kapitereersimasut napparsimarulunnginnerusartut oqariartuutaavoq.

AAMMA ATUARUK 40-leereersimasunut sioqqutsisumik pingajussaanik akiuussusersuisoqalertoq

- Juullikkunni angalasorpassuit eqqarsaatigigaanni nunatsinni illoqarfinnut nunaqarfinnullu tuniluunnermik nassataqartoqarnissaa qularutissaanngilaq. Taama pisoqarnissaanut piareersimasariaqarpugut.

- Omikron tuniluutianerujussuuvoq, taanna napparsimassutigineqartariaqanngilaq, amerlasuut napparsimarululerneq ajorput, kisianni taama tuniluutiatigiguni coronavirusit allat tuniluunneranit annertunerusumik amerlasuut napparsimalersinnaapput.

Nittartakkatigut radiokkulluunniit malinnaagit

Innuttaasut 40-leereersimasut pingajussaanik kapitinnissamut periarfissaanik marlunngornermi sioqqutsisumik kaammattuuteqarfigineqarnerisa kingunerisaanik akiuussuserneqarnissaq, Nakorsaanerup naalakkersuisullu kaammattuutigaat.

Assersuutigalugu aggustip naanerani aappassaanik akiuussutissamik kapitissimagaanni pingajussaanik kapitittoqarsinnaalereerpoq. Sakkortusaataasumik pingajussaanik kapitinnissamut piffissat sumiiffiillu sumiiffinni arlalinni suli inissivinneqanngillat, peqqinnissaqarfimmulli siarnguttoqassanngilaq.

Tamanna peqqissutsimut naalakkersuisup, Kirsten L. Fenckerip (Naleraq) nassuiaatigaa.

- Ilulissat, Aasiaat, Sisimiut, Nuuk, Qaqortoq, pingajussaanik akiuussusersuineq aallartissapput. Ullussai sumiiffiilu corona.nun.gl-imi kiisalu radiokkut nalunaarutigineqartarumaarput. Innersuutigissavara taakku atorlugit malinnaaviginissaat, peqqinnissaqarfinnut sianeqattaarnerit atornagit.

Nakorsaaneq nunatsinni corona pillugu killiffimmik aamma oqaaseqarpoq.

AAMMA ATUARUK Corona pillugu ullumikkut kisitsisit: Ataasinngormamit tunillatsissimasut nutaat 36-t

- Tunumi imaluunniit Qaanaami qujanartumik tuniluuttoqanngilaq. Upernavimmili unammillernartoqarnikuuvoq. Tamannali maanna ilorraap tungaanut ingerlavoq. Upernavimmi amerlasoorujussuit tunillatsinnikuupput. Tuniluunnerli qaangiukkiartortoq ilimagaarput. Amerlasuunik tunillatsittoqarpallaarunnaarpoq imaluunniit Upernavimmi tunillatsissinnaasut amerlagunnaarput, nakorsaaneq oqarpoq, nangillunilu:

- Upernaviup nunaqarfiini pisut suli malinnaaffigilluarpagut, ilungersunartumilli nalunaaruteqartoqanngilaq.

Ilulissani tunillatsittoqallattaaginnarpoq, ajornartorsiutaanngilarli, nakorsaaneq oqarpoq.

Coronavirusit ilaata Deltap nunatsinnut ukiup affaata matuma siorna anngunneraniilli Nuummi aamma tunillatsissimasoqaqattaaginnavippoq. Tunillatsissimasumik ataatsimik Qaqortumi aamma paasisaqartoqarpoq.