Naalakkersuisut Kalaallit Airports milliardit sisamararterutaannik aningaasaliiffigigaat
Naalakkersuisut kaasafimminnut ippassaq kaavissorput. Namminersorlutik Oqartussat Kalaallit Airports Holding A/S-imik piginneqataassutitik 252 millionit koruuninik amerlivaat.
Aningaasat Nuummi Ilulissanilu mittarfiit allilernerisa inaarsarnissaannut Qaqortumilu mittarfiliornissap aallartinnissaanut pisariaqartuupput.
Tamanna immikkut ittumik ataatsimeersuarnikkut pivoq, tassanilu piginnittut, Namminersorlutik Oqartussat, piginneqatigiiffiup nammineq pigisaasat qaffannerat akueraat.
AAMMA ATUARUK Naalakkersuisut aalajangiuppaat: Mittarfiit 900 millionit koruuninik akisunerussapput
Naalakkersuisut Kalaallit Airports Holdingip aningaasaataanik amerliliinissaannik akuersisuupput. Tamanna politikerit 2022-mi aningaaasanut inatsisissaq akuerimmassuk pivoq.
Missigersuutit eqquinngitsut
Mittarfiliortiternerit aallaqqaammut 3,6 milliardit koruuninik akeqartussatut missingersugaapput.
Kisianni Nuummi Ilulissanilu mittarfinnik allilerinerit amerlanerusunik aningaasaliiffigineqartariaqartut upernaaq tamanut paasinarsivoq.
Mittarfiliortut 900 millionit koruuninik qaavatigut pisariaqartitsisut tamani nassuiaami erserpoq.
Mittarfiliortiterneq
Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
Tamatuma saniatigut Qaqortumi nunap iluani mittarfimmik nutaamik, 1500 meterinik takissuseqartumik sanaartortoqassaaq.
Tamanna oqartussat piumasaqaateqarnerulernerisigut sanaartukkanut aningaasartuuteqarnerunermik peqquteqarpoq. Ingammik avatangiisiit eqqarsaatigalugit piumasaqaatit angallannermullu aqutsisoqarfimmiit piumasaqaatit tassani pineqarput.
Nalunaarusiami allapput, piumasaqaatit taakkua pilersaarusiulereernermi atuutilersimapput.
Aamma Mittarfimmi sanaartugassanut missingersuutit allaqqaammut naammassimanngillat. Nalunaarusiami allapput "pineqartut tassaasut illorsuit mittarfiup nalinginnaasumik ingerlanneqarneranut pisariaqartut aammalu nunat tamalaat akornanni timmisartuussisunik immikkut sullissinermi atortussat. Taava aamma illorsuaq atortussaasivik, pilersaarutini siullermik ilaanngitsoq, aamma aningaasartuutinut ilaavoq."
AAMMA ATUARUK Aalisakkat mittarfissaq piviusunngortissagaat: Qaqortumi mittarfissaq ima aningaasaliiffigineqassaaq
Taava aamma Qaqortumi mittarfissaq 1500 meterisut takitigissaguni sanaartornera koruunit milliardit ataaseq sinnerlugu akeqassasoq ukiaq manna paasinarsivoq. Missingersuutinik 669 millionit koruuninik akeqartussaassangatitaavoq.
Taamaammat politikerit kissaatigisaattut mittarfik takissuseqassappat, sanaartornissaaanut 400 miullionit koruunit amigaataaapput.
Sumi tamani aningaasassarsisut
Nunatta karsia atorfissaqanngitsunik 250 millionit koruuniuteqanngilaq. Politikerit taamaammat aningasassarsiortariaarsimapput.
Qaqortumi mittarfik
Deloitte Qaqortumi mittarfik pillugu aningaasaqarnikkut sunniutissanik nutaamik naliliivoq.
Nunatta kujataani timmisartukkut angallannermi Narsarsuaq maanna aqqusaarneqartarpoq. Qaqortumi mittarfittaartoqarnerani Narsarsuarmi mittarfik taarserneqassaaq.
Mittarfilli pillugu suliniut iluamik aallartinngisaannarpoq. Naak suliniut taanna marloriarlugu suliariumannittussarsiuunneqaraluartoq.
Sanasulli suliffeqarfii suliariumannittut tamarmik missingersuutit Naalakkersuisuusimasut Kim Kielsen siuttuliullugu isumaqatigiissutiginikuusaat qaangertarpaat.
Taamaammat attaveqatigiinnermut naalakkersuisoq, Naaja Nathanielsen (IA) Qaqortumi mittarfiliorsinnaanermut aningaasaqarnikkut nutaamik naliliisitsivoq.
Taamaammat aningaasat ilaat Tusass A/S-ip 50.000.000 koruuninik naatsorsuutigisatut immikkut ittumik sinneqartooruteqarneratigut pissarsiarineqassapput..
Taava Air Greenland A/S 65.000.000 koruuninik utertitsisimavoq.
Aningaasat taakkua tassaapput Namminersorlutik Oqartussat Air Greenlandiumut corona peqqutigalugu siorna amigartuunnginnissamut qularnaveeqqusiussai.
Timmisartuussisartulli naammattunik ilaasoqarput, aningasallu atorfissaarullugik.
Kingullertullu 137.000.000 koruunit piffissaq ungasinnerusoq eqqarsaatigalugu aningaasaliissuteqarnissamut aningaasaateqarfimmeersuupput. Aningaasat tassaniittut nunatta karsiata 2019-mi sinneqartoorutigai.
