Naalakkersuisut nunatsinni uuliasiortitseqatigiiffik atorunnaarsinniaraat
Naalakkersuisut aalajangiisinnaatitaagunik uuliasiortitseqatigiiffik Namminersorlutik Oqartussanit pigineqartoq, Nunaoil A/S atorunnaarsinneqassaaq. Taakku inatsisissatut siunnersuumminni allapput.
Tamanna nunatsinni uulia pillugu periusissiap nunatsinnilu siunissami uuliasiornissap 2021-mi juunip 24-ani unittareernerannik pissuteqarpoq. Tamanna Nunaoil A/S-imi suliarineqartaraluarpoq. Taamaammat Naalakkersuisut oqarnerat naapertorlugu ingerlatsiviup maanna ilusaatut ittumik ingerlatsiinnarnissaq pissutissaqanngilaq.
Kulbrintenut akuersissutit naatsumik
Kulbrintemut akuersissutit tassaavoq akuersissut ingerlatsivinnut avataaniittunut soorlu uuliamik gassimillu misissuinissaannut piiaaniaasinnaanisaannullu tunniunneqartaarput.
Tassa imaappoq Nunaoil A/S-ip kulbrintemut akuersissutit toqqaannartumik suliarisinnaajunnaassavai. Taamaalillunilu nunatsinni uuliasiornerit uuliamillu piiaanerit tamarmik taamaatinneqassallutik.
Siunnersuut ukiakkut ataatsimiinnermi septembarip ulluisa 29-anni aatsaat siullermeerneqassaaq. Tassanilu Inatsisartuni partiit tamarmik ingerlatsiviup ingerlaannannginnissaa isumaqatigiissutigissavaat.
Inatsisartut inatsisissatut siunnersuut oktobarip ulluisa 20-anni aappassaaniissavaat.
Naalakkersuisut atorunnaarsitsineq arlaatigut kingunerluuteqarnissaa naatsorsuutiginngilaat, pissutigalugu ingerlatsiviup sulinerata annerpaartaa unittareermat.
Siunissaq attanneqarsinnaasoq
Uulia pillugu periusissiaq uuliasiornerullu unitsinneqarnissaa pinngortitaq, piniarneq aalisarnerlu ilaatigut eqqarsaatigalugit aalajangerneqarpoq. Tamanna Naalakkersuisunit 2021-mi juulip ulluisa 15-ianni tusagassiuutinut nalunaarummi allassimavoq:
- Pinngortitamut avatangiisinullu pitsaanngitsumik sunniissaaq, aalisarnermut pitsaanngitsumik sunniissaaq nunarsuarmilu silaannaap pissusaata allanngoriartornerani ajornartorsiornermik ajornerulersitseqataassaaq, Naaja H. Nathanielsen taamani aatsitassanut naalakkersuisuusoq tusagassiuutinut nalunaarummi allappoq.
- Uuliasiornermi uuliamillu qalluinermi avatangiisinut kinguneqaatit annertuallaartut Naalakkersuisut naliliipput.
Tassunga taarsiullugu nukissiuutinut ataavartut soorlu erngup nukinganik nukissiorfiit misissorneqartariaqarput.
- Siunissaq uuliamiinngilaq. Nukissiaq ataavartoq siunissaavoq, tassanilu iluaqutissavut amerlanerujussuupput.
Nunarput 2021-mi novembarip ulluisa aqqarnanni uuliamik gassimillu pilersuinerup atorunnaarsikkiartuaarnissaanut siunertaqartumut suleqatigiinnermut ilaalerpoq.
Suleqatigiiffik BOGA-mik (Beyond Oil and Gas Alliance) taaguuteqarpoq, taannalu Naalagaaffiit Peqatigiit silap pissusia pillugu siorna ataatsimeersuarneranni COP26-mi saqqummiunneqarpoq.
Nunalerinermut, imminut pilersornermut, nukissiuutinut avatangiisinullu naalakkersuisoq, Kalistat Lund (IA) tusagassiuutinut nalunaarummi ima oqarpoq:
- Silap pissusaata allanngoriartornera avatangiisitsinni maanna pivoq allannguutit malugineqarsinnaapput. Suleqatigiiffimmi BOGA-mi suliniutigineqarlutik aallartittut nukissiuutit ataavartut pingaartinneqarnerat kalaallit nunaannut pingaaruteqartorujussuupput, nukissiuutit maanna ajornartorsiutinik pilersitsisut nalunngisagut atorunnaarniarneqalerlutik, Kalistat Lund oqarpoq.
