Naalakkersuisut: Periusissiami nukik ataavartoq pingaarnerpaassaaq
Naalakkersuisut Kalaallit Nunaata Parisimi isumaqatigiissummut ilanngunnissaanut siunnerfeqarput. Periusissiornerli suli aallartinngilaq. Inatsisartummi upernaaq manna ataatsimiinnerminni nunatta isumaqatigiissummut nunatut nangaassuteqarnera atorunnaarsinneqassanersoq aalajangiiffigeqqaassavaat.
- Isumaqatigiissut aallaavigalugu inatsisitigut naqissusiinissaq suliareriarlugu, taava alloriarnerit nunani allani ingerlanneqarsimasut assigalugit alloriassuugut, Naalakkersuisut siulittaasuat, Múte Bourup Egede oqarpoq.
Taamaalilluni Inatsisartunut ilaasortat amerlanerussutillit, Parisimi isumaqatigiissummut nunatta ilanngunnissaa upernaaq manna kissaatigissappassuk, Naalakkersuisut silap pissusianut tunngasumik periusissiornissartik aallartissavaat.
Parisimi isumaqatigiissummi nunarsuaq tamarmi silap 1800-kkut qiteqqunneranut naleqqiullugu gradinik marlunnik kiarnerulinnginnissaanik ilaatigut anguniagaavoq. Taamaalillutik nunat isumaqatigiissumut atsioqataasimasut suliffissuit CO2-mik aniatitsinerinik annikillisaarusullutik. Nunat 150-nit amerlanerusut atsiornikuupput. Taakkununnga Danmark ilaavoq.
Nukik ataavartoq pingaarnerpaasoq
Kalaallit Nunaat isumaqatigiissummut ilanngutissaguni silap pissusianut tunngasumik periusissiussaaq. Periusissiamilu suna pingaarnerpaassanersoq Naalakkersuisut siulittaasuata aalajangiutereerpaa.
- Pingaarnerpaaq tassaavoq nukissiuutinik ataavartunik atuisinnaanerup annerulersinnissaa avatangiisinullu mingutitsinerup annikillisarneqarnissaa, Múte Bourup Egede oqarpoq.
AAMMA ATUARUK Danmark nunatta erngup nukinganik nukissiorfiliornissaanut milliardilikkaanik atorsinnaanissamik ikiuiniartoq
Naak periusissiap imarisassaani pingaarnerpaaq suunersoq Naalakkersuisut siulittaasuata aalajangiussimagaluaraa Naalakkersuisut isummatik kisiisa periusissiornerminni atussanngilaat.
- Periusissiorneq inuussutissarsiortut susassaqartullu assigiinngitsut peqatigilluinnarlugit suliarineqassooq. Taamaaliornikkut nunarput anguniagassanik ataatsimoorussanik siunnerfeqassaaq, Múte Bourup Egede oqarpoq.
Ministeriuneq iluarisimaarinnittoq
Ministeriuneq Naalakkersuiut Parisimi isumaqatigiissummut ilanngunnissaminnik siunnerfeqarnerat nuannaarutigalugu tusagassiortunik Ilulissat Kangerluani katersortitsinerminni oqarpoq.
- Isumaqarpunga Naalakkersuisut nutaat Parisimi isumaqatigiissummut ilanngunniarlutik aalajangernerat pitsaalluinnartuusoq. Taamaalilluta naalagaaffeqatigiinnermi akiuuteqatigiissinnaagatta, Mette Frederiksen oqarpoq.
AAMMA ATUARUK Naalakkersuisut danskit illersornissamut isumaqatigiissutaat suli isummerfiginngikkaat
Naalakkersuisut siulittaasuata, Múte Bourup Egedep, ministeriunerup Mette Frederiksenip nunatsinnut tikeraarnera iluatsillugu siunnerfeqaqatigiinnermik taasaminnik atsioqatigaa.
Taanna atsioqatigiinneq Nuummi Utoqqarmiut Kangerluarsunnguanni erngup nukiganik nukissiorfiup allilerneqarnissaata kiisalu Qasigiannguit Aasiaallu akornanni erngup nukiganik nukissiorfiliortoqarnissaanut suleqatigiinneruvoq.
