Naleqqap sunniivigeqatigiinnissamut isumaqatigiissut taperseraa
Nammineq naalagaaffeqalernissamut nammineq pilersuinerulernissaq pisariaqarpoq.
Naleqqap politikkikkut oqaaseqartartua, Jens Napaattooq oqarpoq. Taassuma sunniivigeqatigiinnissamut isumaqatigiissut Naalakkersuisut siulittaasuata, Múte B. Egedep (IA) danskillu ministeriunerata Mette Frederiksenip marlunngornermi atsiugaat ilorrisimaarutigilluinnarpaa.
Sunniivigeqatigiinnissamut isumaqatigiissut pissutigalugu Naalakkersuisut erngup nukinganik nukissiorfiliornissamut atatillugu nunat tamalaat akorannni atornisartarfimmut Danmarkimit taperserneqarlutik annerpaamik 3,1 milliardit koruuninik atorsinnaapput, imaluunniit nunarput Danmarkimit atorsinnaalluni.
AAMMA ATUARUK Danmark nunatta erngup nukinganik nukissiorfiliornissaanut milliardilikkaanik atorsinnaanissamik ikiuiniartoq
- Nunatsinni nammineq pilersornerunissarput Naleqqami pingaartittorujussuuarput, naalagaaffinngornissatsinni nammineq pilersornerunissaq avaqqussinnaanngilarput. Taamaammat Naalakkersuisut siulittaasuata angusarisaa tulluusimaarutigaarput, Jens Napaattooq oqarpoq.
Naleraq Inuit Ataqatigiillu naalakkersuisoqatigiipput.
Solari annertoorujussuusoq
Aningaasanik 3,1 milliardinik atorneq annikitsuinnaanngilaq - nunarpullu nammineq taama aningaasaateqanngilaq. Inatsisartuni amerlanerussuteqartut erngup nukinganik nukissiorfiup Utoqqarmiut Kangerluarsunnguaniittup Nuummi innaallagialersuisup allineqarnissaa aamma erngup nukinganik nukissiuuteqarfiup nutaap Aasiannut Qasigiannguanullu pilersuisussap pilersinneqarnissaa siorna novembarimi akuersissutigereernikuuaat. Tamanna 3,1 milliardit koruunit missaannik akeqassaaq.
AAMMA ATUARUK Partiit talerperliunerusut danskit erngup nukinganik nukissiorfinnut aningaasaleeqataasinnaanissaat ilorrisimaarutigigaat
Danmarkilu atortoqarsinnaaneranut maanna sillimmasiivoq. Naleqqalli tamanna imminut aningaasaliinertut isigaa:
- Siunissami solari annertoorujussuaq eqqussorneqarunnaartussaq qiviaraanni Naalakkersuisunngortut ukiunut 80-inut naatsorsuineranni 3 milliardit sinnerlugit iluanaarutaasinnaanerat inuiaqatigiinnut pitsaanerusumik siunissamik kinguaatsinnut aningaasaliinerummat tulluusimaarutigaarput maannakkut piviusunngorsinnaanngorluni alloriarfiummat, Jens Napaattooq oqarpoq, taassuma Naalakkersuisut inuiaqatigiinni aningaasaqarnikut kingunissanik naliliineq innersuussutigalugu.
Mittarfinnut pilersaarutinik allaanerusoq
Nunarput mittarfinnut pilersaarutinut atatillugu Danmarkimit aningaasaleeqataaffigineqarmat Naleraq naalakkersuisoqatigiinnit tunuarnikuuvoq. Danskit naalagaaffiat aningaasaliinikkut piginnaassutsip ilaanik pissarsivoq.
Jens Napaattuup maannakkut isumaqatigiissut taamanikkumit allaanerulluinnartoq oqaatigaa.
- Qallunaat Nunaannut piginneqataaneq annertoorujussuaq tunniunneqarpoq minnerunngitsumik siulersuisuni qallunaat marluinnaat ilaasortaagaluarlutik, taakkua naaggaarpata suneqarsinaanani pissaanermik annertoorujussuarmik Qallunaat Nunaanninngaanniik aqunneqarnerput, ukiorpassuit qimanniagarput suli pituttorneqaqqippoq. Taakkuupput akerlerilluinnakkagut.
