Nanortalimmi imeq qalaqqaarneqassasoq: E. coli bakteeriallu allat paasineqartut

Nanortalimmi imeqarfimmi imeq E. coli-mik allanillu napparsimalersitsisinnaasunik bakteeriaqalersimasoq paasineqarpoq.

- Imeq E. colimik akoqaraangami aamma bakteerianik allanik imaluunniit virusimik akoqartarpoq, bakteeriallu ilaat napparsimalersitsisinnaapput, Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfik KNR-imut nalunaarpoq.

Taamaammat Nanortalimmi innuttaasut imermik iminnginnerminni illulerinermilu atunnginnerani qalaateqqaartassavaat.

- Qalaassineq bakteeriaajaasarlunilu virusiiaasarpoq, naalakkersuisoqarfik nalunaarpoq.

AAMMA ATUARUK Saarlumi erngup qalaateqqaarlugu atorneqarnissaa innersuussutigineqartoq

Imermik misissuinermi nutaami ulorianartunik bakteeriaqarunnaartoq paasineqarpat qalatitseqqaaqqusineq aatsaat atorunnaarsinneqassaaq.

- Qalatitseqqaaqqusineq qaqugu atorunnaassanersoq piffissami matumani oqaatiginissaa ajornakusoorpoq. Mingutsitsinermi pissutaasoq ilisimaneqanngilaq, tamannalu paasiniarlugu erngertumik sulissutigineqarpoq, naalakkersuisoqarfik paasissutissiivoq.

Imermi E.coli-qarneranut nassuiaatissarpassuusinnaapput. Tamanna imikoorummik, uumasunik toqungasunik imaluunniit imeqarfiup eqqaani timmiarpassuaqarneranik pissuteqarsinnaavoq.

E. coli suua?

E. coli bakteeriaapput eqimattat, taakku uumasuni inuillu inalugaasa sulluanni nassaassaasarpoq, taannalu erlavinni aatsortinneqalersitsisarpoq.

- Imeq uumasut inuillu anaannit mingutsinneqaraangami inuit amerlanertigut naarlulertarput aamma erlavinni allatigut ersiuteqalersarlutik, Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfik KNR-imut paasissutissiivoq.

Inunnit imeq pissutigalugu napparsimalertunik suli nalunaaruteqartoqanngilaq.