NATO-p timmisartuutaasa 1 procentii, qamutillu sorsuutit 1 procentiisa Ukrainemut tunniunneqarnissaat Zelenskyj-p kissaatigaa

Ukrainep nunani tamalaani iligisaasa sakkussianik Ukrainemut ikiorsiinerisa annertusarneqarnissaat, Ukrainep præsidentiata Volodymyr Zelenskyj-p kissaatigaa.

- Qamutit sorsuutit timmisartullu taamaallaat 1 procentiisa tunissutigineqarnissat Ukrainep kissaatigaa, taanna CNN-imut oqarpoq.

Europami sillimaniarnerup nukittorsarneqarnissaa pillugu Polenip præsidentianik Andrzej Dudamik marloriarluni oqaloqateqarsimanini Zelenskyj-p ilanngullugu oqaluttuaraa.

Ukrainep sakkussanik ikiorneqarnissamik maanna ulluni 31-ni utaqqisimanera Zelenskyj-p oqaloqatigiinnerni maalaarutigaa.

Polenimiut timmisartuutaat Ukraineliaanneqarsinnaagunarput

Ukraine Ruslandip nunamut taassumunnga isaaneranut atugassanik sakkussanik amerlasuunik NATO-mi nunanit maannamut tunineqarsimavoq, timmisartunilli maannamut tunineqarsimanani.

Polenimiut timmisartuutaat malersuutit MIG-29-nik taaguutillit 28-t, amerikamiut Tysklandimi Ramsteinimi sakkutooqarfiannit Ukraineliaanneqarnissaat, Polenip marsip aallartisimalaarnerani siullermik siunnersuutigaa.

Siunnersuulli USA-mit itigartitsissutigineqarpoq, aarlerinaateqarsinnaasorigamikku. Ukrainemi sorsunnerup annertusineqarneratut Ruslandimit isigineqarnissaa USA-p matumani ernummatigaa.

Polenimiut timmisartuutaasa Ramsteinimit Ukrainemut ingerlateqqinneqarsinnaanissaannut USA-mit maanna ammaffigineqartoq, Ukrainep nunanut allanut tunngasunut ministeriata Dmytro Kulebap allakkatigut nutaarsiassaqartitsivimmut AFP-mut arfininngornermi oqaatigaa.

Naatsorsueqqissaartarfiup Statistap kisitsisaatai naapertorlugit nunat NATO-mi ilaasortat qamutit sorsuutit katillugit 14.500-t missaat, timmisartullu assigiinngitsut 16.300-t missaat pigivaat, timmisartut malersuutit qulimiguullillu taakkununnga ilaallutik.

NATO-p sakkussiaasa 1 procentii kisitsisinngorlugit tassaapput qamutit sorsuutit 147-t, timmisartullu assigiinngitsut 163-it.