- Neqit akitsuutaarunnerat ajunngilaq, kisianni kalaalimerngit akikinnerusariaqaraluarput
Neqit akikinnerulissapput.
Inatsisartuni taama aalajangertoqarpoq. Neqit nunatta avataaneersut nunatsinnut eqqunneqarnerannut akitsuutaat, politikikkut aalajangertoqanerata kinguneranik ukiortaamiit atuukkunnaarsinneqassapput.
Akitsuutit peerneqarnsisaat Demokraatit siulittaasuannit, Jens-Frederik Nielsenimit siunnersuutigineqarpoq. Nersussuup aserortikkap neqaata akia 10 koruuninik apparneqarnissaa taassuma naatsorsuutigaa.
Tamanna pillugu Nuummi innuttaasut isumaat Nuuk Centerimi KNR-imiit tusarniaaffigaagut.
Abisa Dalager
Neqit nunatta avataaniit tikisinneqartartut akitsuutaat ukiortaamiit peerneqassapput, tamanna qanoq isumaqarfigaajuk?
- Akikilleqilli ajunngilaq, aamma kalaalimerngi akersui ingasappallaarujussuaraluarput. Uagutsinnut pisiassaarpianngillat.
Qanoq ilinnut kinguneqassava akikillippata?
- Soorunami ilaaqquttarama iluassaqaaq.
Susanne Hansen
Neqit nunatta avataaniit tikisinneqartartut akitsuutaat ukiortaamiit peerneqassapput, tamanna qanoq isumaqarfigaajuk?
- Iluaallassamaaq. Iluaallassamaartorujussuuvoq tassami pisiassat assigiinngitsut maannakkut akisunermik, neqit akii akikillippata iluassaqaaq.
Neqit avataaniit tikisinneqartartut akitsuutaat peerneqartussanngorpoq, tamannalu nunatta karsianut akisussaaq, tamanna qanoq isumaqarfigaajuk?
- Nunatsinniit nioqqutissaatigut akikinnerulertuuguni ajunnginnerussagaluarpoq immaqa. Avataaninngaaneersut pinnagit, Susanne Hansen oqarpoq.
Angutitsiaq Esbosetsen
Neqit nunatta avataaniit tikisinneqartartut akitsuutaat ukiortaamiit peerneqassapput, tamanna qanoq isumaqarfigaajuk?
- isumaqarpunga ajunngitsoq. Kisianni uggornarpoq paasillugu savaaqqap neqaata akitsuutaat ataannartinneqarnissaat.
Sooruna?
- Neqit nunatsinninngaaneersut unga pisiarinerusarakkit.
Akikillinerat innuttaasunut qanoq kinguneqassangatippiuk?
- Uku neqit eqqarsaatigalugit amerlasoorujussuit pisiarineqartarput, tamanna iluaqutaalaarsinnaasutut takorloorpara, Angutitsiaq Esbosetsen oqarpoq.
Neqit avataaniit tikisinneqartartut akitsuutaat peerneqartussanngorpoq, tamannalu nunatta karsianut akisussaaq, tamanna qanoq isumaqarfigaajuk?
- Ullutsinni suna tamarmik akitsoriartuinnartillugu, taamatut inissiisoqarnera ajorinngilara.
Maren Clasen
Neqit nunatta avataaniit tikisinneqartartut akitsuutaat ukiortaamiit peerneqassapput, tamanna qanoq isumaqarfigaajuk?
- Soormi avataaniit tikisitat akitsorlugit kalaalimerngit akikilligunikkit. Kalallimerngimmi ima akisutigaat, appa ataaseq erisariigaq 130 koruunit. Uagut tamakkutorsinnaanginnatta ajunngilaq qeerlutuutuinnassaagut taanna qaalernarneruvoq, taanna oqarpoq.
Neqit nunatta avataaniit eqqunnertarnerannut akitsuut peerpat nunatta karsiata ukiumut 13,3 millionit koruuninik annaasaqaatigisassavaa.
Taakkuli qanoq matussuserneqassanesut, politikerit suli naluaat.
