Nissiaqqat suiaaqatiminnoortorpalaartut kalaalerpaluttut Facebookimi akerartorneqartut

Smiley illartut LGBT+-itut inuuneq nalinginnaasuunnginnerarlugu nuanninngitsumik oqaaseqaatit tassaapput Facebookimi ulluni kingullerni qisuariaatit atuarneqarsinnaasut ilamininngui.

Danmarkimi LGBT+-imik suliniut Kalaallit Nunaanni LGBT+-itut inuusut pitsaanerusumik atugassaqalernissaannik suliaqartumut Greenland+-imut aningaasaleerusunneranik nutaarsiassaq takkummat qisuariaatit takkupput.  

Suliniut ateqarpoq ”Regnbuekravlenisser af Sebastian Soelberg”, nissiaqqallu suiaaqatiminnoortorpalaartut taakku tuniniarneqarnerisigut aningaasanik katersuisoqassaaq.

Facebookimili takuneqarsinnaasutut inuit tamarmik suliniummik nuannarinninngillat. Tamannali Brian Kjær Capkanip ”Regnbuekravlenisser af Sebastian Soelberg”-imi suliassanik isumaginnittup tupaallaatiginngilaa.

- Oqaaseqaatit takusartagaraavut. LGBT+-imeersunik saqqummertoqalaaraangat pinerit tamangajaasa inuit ilaannit oqaluttuunneqartarpugut kukkusaasugut arlaannullu attuumassuteqanngitsugut, oqarpoq.

Pissutsit taamaannerannut ilisimasaqannginneq pissutaasoq Brian Kjær Capkan oqarpoq.

- Inuit ilisimasaqarfiginngisatik arlalitsigut ajullaatigineqartartut isumaqarpunga. Ilai allaanerusut ajortisaarutitut isigisarpaat. Paasisinnaanngikkunikku isumaqartarput allaanerunitsinnik oqarsinnaatitaallutik. Tamanna Kalaallit Nunaanniinnaq pineq ajorpoq. Nunarsuaq tamakkerlugu pisarpoq.

LGBT+-mik amigartumik paasinninneq

Greenland+-imi aamma isumaqarput oqaaseqaatit nuanninngitsut ilisimasaqannginnermik pissuteqartut. Sofus Fenger Hove, suliniaqatigiiffimmi siulersuisuunernut ilaasoq isumaqarpoq LGBT+-ip suuneranik nalinginnaasumik paasinninneq amigartoq.

- Uanga isinni ilinniarsimanermik amigaateqarnermik LGBT+-itullu inuusut oqaluttuarisaanermi nalinginnaalluinnartumik nunarsuarmioqataasimanerannik amigartumik paasinninnermut tunngassuteqarpoq, oqarpoq nangillunilu:

- LGBT+-itut inuusunut isuma pissuserlu tamanna ajoqutaasorujussuuvoq. Tamannarpiarlu aamma pissutaaqataalluni LGBT+-itut inuusut tassaapput ikinnerussuteqartuni imminut toqunnissamik eqqarsarnerpaallutillu imminut toqoriaraluarsimanerpaasut. Pinngortitaanerisa akuerineqannginnerat pissutigiinnarlugu.

AAMMA ATUARUK Nissiaqqat qiortagassat suiaqatinoortorpalaartut kalaalerpaluttut nunatsinniittunut tapersiissutaassasut

Sofus Fenger Hovep aamma tupaallaatiginngilaa suliniut pillugu Facebookimi nuanninngitsunik oqaaseqaateqartoqarsimammat.

- Nunap ilaanut tunngassuteqalaarpoq, taamaammallu suliniaqatigiiffipput pilersillutigu. LGBT+-imik suliassaqarfiup pisinnaatitaaffiit pitsanngorsarniarlugit paasinninnerullu pitsanngorsarniarlugu sulinerput ingerlateqqissavarput, erseqqissaavoq.

Nakkaannanngillat

Taamaattorli Brian Kjær Capkan imaluunniit Sofus Fenger Hove oqaaseqaatit nuanninngitsut nakkaannarfiginianngilaat. Akerlianilli suliniutip taamaattup qanoq pisariaqartigineranik paasinninnerulersiinnarpaat. Suliniut aqqutigalugu Kalaallit Nunaanni LGBT+-itut inuusut takussavaat kisimiinnatik. 

- Kalaallit Nunaanni meeqqat inuusuttullu allaanerullutillu allatut kinguaassiutinik atuisut amerlapput, nuanninngitsumillu ulluinnarni naapitsisarlutik. Nuanninngitsumik oqaaseqaatit oqallinnermi matumani sakkortuumik saqquminera taamaammat kajumissaataannaavoq. Tassami Greenland+-ip sooq ukioq manna aningaasaliissutitsinnik tigusisuunissaanik ersarissumik takutitsiinnarpoq, Brian Kjær Capkan oqarpoq.

Erseqqissaatigaali Kalaallit Nunaanni suliniummut inuit tamarmiunngilluinnartut ajorinnimmata. Suliniummillu tapersersuisimasunut Brian Kjær Capkan qujassuteqarusuppoq.

- Kalaalerpassuarnut nissiakkanik qiortagassarsisimasorpassuarnut oqarusuppunga qujanarujussuaq. Pisisimasummi amerlaqaat. Kisianni toqqortagut suli amerlapput taamaammallu alakkartereriarlusi inniminniiniarisi, erseqqissaavoq.

Nissiaqqat qiortagassat prideposters.com-imi pisiarineqarsinnaapput 199 koruuninillu akeqarlutik. Nissiaqqat qiortagassat Kalaallit Nunaannut nassiunneqartarput aningaasallu affaat Greenland+-imut nakkartinneqartarlutik.