Nunatta Eqqartuussisuuneqarfiata inuusuttup nakuusernera toqumik kinguneqartoq pillugu suliaq sukannernerulersikkaa

Angut taamani 18-inik ukioqartoq Tunumi nunaqarfimmi Sermiligaami ataataminik 42-nik ukiulimmik toqutsisimasutut januaarip aallaqqaataani pasineqarluni tigusarineqarpoq.

Eqqartuussivimmi suliaq Eqqartuussisuuneqarfik Sermersuumi upernaaq suliarineqarpoq, angullu maanna 19-inik ukioqartoq ukiuni marlunni qaammatinilu arfineq-pingasuni pineqaatissinneqarsimasunut inissiisarfimmiittussanngortinneqarpoq.

Tamannali naammanngitsoq, unnerluussisussaatitaasut isumaqarput, taamaammat suliaq suliassanngorteqqippaat. Eqqartuussivimmi suliaq maanna nunatta eqqartuussisuuneqarfiani suliarineqareerluni eqqartuussut sukannernerulersinneqarpoq: Angut 19-inik ukiulik toqumik kinguneqartumik nakuusernini pissutigalugu ukiuni pingasuni qaammatinilu pingasuni pineqaatissinneqarsimasunut inissiisarfimmiittussanngortinneqarpoq.

Unnerluussisussaatitaasoq, Marutha Thayapharan oqarpoq.

Tukertaaneq aamma niaquatigut timaatigullu tukkaaneq

- Eqqartuussiveqarfiup angutip pasineqartup ukiukinnera aamma toqutaasumut illersorsimanera pingaartuutippaa. Nakuuserneq 19-inik ukiullip imminut illersorneranik aallartippoq, taassumali nakuusernera pisariaqanngitsumik tukertaanermik aamma niaquatigut timaatigullu tukkaanermik ingerlaannarpoq, unnerluussisussaatitaasoq oqarpoq.

- Nakuuserneq taama ittoq immikkut ittumik ulorianartumik nakuusernertut isigineqartarpoq, taamaattumik sivisunerusumik pineqaatissinneqarnissaanut tunngavissaqarsoraarput.

AAMMA ATUARUK Angut inuusuttoq Sermiligaameersoq ataataminik toqutsisimasutut eqqartuunneqartoq

Taamaammat unnerluussisussaatitaasut nunatta eqqartuussisuuneqarfiata eqqartuussummik sukannernerulersitsinera illorrisimaarutigaat.

- Eqqartuussivimmi suliaq naammassineqarnera nuannaarutigaara – pingaartumik ilaqutariit ataataasumik uiusimilluunniit annaasaqartut pillugit.

- Aamma Nunatta Eqqartuussisuuneqarfiata unnerluussisussaatitaasut suliamik matumanik taama ilungersunartigisumi isumaqatiginnilluni pineqaatissiissummik sukannernerulersitsinera ilorrisimaarutigaara, Marutha Thayapharan oqarpoq.

Qimagaasunut taarsiineq

19-inik ukiulik toqutaasup nulianut meeraanullu 18-it inorlugit ukiulinnut aamma taarsiissuteqartussanngortinneqarpoq.

Toqutsineq ukioq manna ullormi siullermi pivoq, tamatumali kingorna ullut marluk qaangiutiinnartut angut alla 48-nik ukiulik Tasiilami inissiami toqungasoq aamma nassaarineqarpoq, taassumalu inooqatigisaa toqutsisutut pasineqarluni tigusarineqarpoq.

Suliat taakku marluk pissutigalugit tunumi ajornartoornermi upalungaarsimanermik aallartitsisoqarpoq.

Angut alla toqungasoq Tasiilami apriilimi aamma nassaarineqarpoq, tassanilu tigusarinnittoqarlunilu tigummigallaasoqarpoq.