Nunatta karsia omikronip tuniluunneranit sunnerneqartoq: Ikiorsiissuteqangaatsiarneq amigartooruteqassutaasinnaasoq

Nunarput nunanut allanut sanilliullugu coronamik 2019-imi tuniluuttoqalerneraniit aningaasaqarnikkut iluatsilluartorujussuuvoq.

Naalakkersuisut assersuutigalugu siorna ukiakkut 2022-mut aningaasanut inatsit saqqummiuppaat, tassanilu sinneqartooruteqarnissaq takutinneqarpoq.

Partiit sisamat aningaasanut inatsit ukioq manna 7,6 millionit koruuninik sinneqartooruteqartussatut ataatsimullu 2025-p tungaanut 107,7 millionit koruuninik sinneqartooruteqarfiusussatut naatsorsuuteqarfiusoq isumaqatigiissutigaat. Tassa taakku nunarsuaq tamakkerlugu nappaalanersuaqaraluartoq nunatta karsiani aningaasaatissatut naatsorsuutigineqarput.

Coronalli allannguutaa omikron decembarimi tuniluutilerpoq. Allannguut taanna allannguutinut paasineqarsimasunut allanut sanilliullugu tuniluutianipilussuuvoq. Tamannalu nunatsinni tunillatsissimasut januaarimi aatsaat taama amerlatigineratigut malugineqarsinnaalluarpoq.

Tamanna pissutigalugu inuussutissarsiortut aamma killilersuiffiupput. Imerniartarfiit neriniartarfiillu sapaatini akunnerni arlalinni imigassamik tuniniaaqqusaanatillu unnukkut qulinit ullaakkut tallimat tungaanut matoqqaqqusaapput. Amerlasuut suliffimminnit angerlarsimaannartariaqarput.

Naalakkersuisut tamanna pissutigalugu pingasunik ikiorsiissusiorput, tassa 50-nit ikiorsiissutit, Ukiuunerani ikiorsiissutit, suliffeqarfeqarnermullu ikiorsiissutit.

50-init ikiorsiissutinut Ukiuuneranilu ikiorsiissutinut 10 millionit koruunit immikkut immikkoortinneqarput, Naalakkersuisullu suliffeqarfeqarnermut ikiorsiissutinut 50 millionit koruuninik immikkoortitsillutik. Tassa katillugu 70 millionit koruunit immikkoortinneqarput. Taakkulu nunatta karsianit toqqaannartumik tiguneqarlutik.

70 millionit koruuniniilli qanoq annertutigisut akiliutigineqassanersut suli ilisimaneqanngilaq – tassunga qanoq amerlatigisut qinnuteqarnerat apeqqutaassaaq.

Nunatta karsiata omikronimik tuniluuttoqarnera qaangersinnaalluaraa

Taamaakkaluartorli nunatta karsiani sinneqartooruteqarnissamik naatsorsuuteqarneq ukiup naanerani amigartooruteqarnermiilersinnaavoq. Naalli kontumi aappaluttumik ikittaartoqaraluartoq aningaasaqarnermut naalakkersuisoq, Naaja H. Nathanielsen (IA) isumalluarpoq:

- Ukioq manna amigartooruteqaraluarutta aqussinnaalluarparput, nunatta aningaasaqarneranut akisussaanerussagutta aningaasat ukiuni tulliuttuni qanoq atussanerlugit mianersornerussaagut.

- Kingunerluuteqarnissaa qularnanngilaq, kisianni ukioq manna amigartooruteqarnissarput qaangerluarsinnaavarput, nunarsuarlu tamakkerlugu siulittorneqarsinnaanngitsumik tunillaassuuttoqarneraniinnermi inissaqartinneqassaaq, Naaja H. Nathanielsen oqarpoq.

Ikiorsiissutimmi aningaasartaat Namminersorlutik Oqartussat akiliisinnaassuseqarneraneersuupput, tassa Namminersorlutik Oqartussat akiligassanut, aaqqiissutissanut siulittorneqarsinnaanngitsunillu ajornartoornermut soorlu coronamik ilungersuatitsisoqarneranut atugassaanneersuupput.

Naalakkersuisut Inatsisartunut saqqummiuttagaat, tassa Aningaasaqarnermut pillugu Nassuiaat naapertorlugu Namminertorlutik Oqartussat 2021-mi apriilimi 1 milliardit koruunit missaannik akiliisinnaassuseqarput.

- Nunattami karsiani akiliisinnaassuseqarnitsinnut ilaasumik aningaasaateqarpoq, taakkulu pissutsinik taamaattuniinnitsinni tigusiffigisinnaavagut, Naaja H. Nathanielsen oqarpoq.

- Soorunami ukiunut tulliuttunut sunniuteqassaaq, tamannali ineriartornissamut siuariartornissamullu ajornartitsilernavianngilaq. Nutaanik sulioniuteqarnissamut aningaasaliinissamut ingerlatsinissamullu suli periarfissaqassaaq. Kisianni soorunami akisussaassuseqassaagut.

Qanorli kingunerluuteqartoqassanersoq Naaja H. Nathanielsenip tikkuarusunnagu oqaatigaa.

- Ukioq naanerani qanoq inerneqarnissaa ilisimanngilarput, kisianni sinneqartoorutissat ikiorsiissutinik annikillisarneqarnissaat tamatumalu amigartooruteqarnermik kinguneqarsinnaanera naatsorsuutigissavarput.

Ikiorsiissutit pisariaqarunnaariartortut

Nunatsinni sumiiffinni arlalinni suli tuniluuttoqangaatsiarpoq. Nuummili Ilulissanilu assersuutigalugu tuniluunneq annikilliartorpoq. Aamma killilersuuteqartoqarunnaarpoq, nakorsaanerullu omikronimik tuniluunneq nunarsuaq tamakkerlugu tuniluunnerup naggatissaaniileriartorunarnitsinnik nalilernikuuaa.

Naaja H. Nathanielsenip tamanna ikiorsiissutit atorunnaarnissaat aamma neriuutigaa.

- Pissutsit piffissami sivisunerusumi taamaassappata tamanna politikkikkut isumaqatigiinnernut kinguartitsigallarsinnaavoq. Nunarsuarli tamakkerlugu tuniluunnerup naggatissaaniinnerput ikiorsiissutillu ukiuni tulliuttuni pisariaqartinneqarpallaarunnaarnissaat eqqoriarpara.

- Maanna mianersortumik neriulluarniarlunga ikiorsiissutit taama annertutigeqqinnginnissaat eqqarsaatigaara, Naaja H. Nathanielsen oqarpoq.