Nuummi ikuallattoqarnerani inissiat arfineq-marluk eqqugaasut: Tamarmik allamut inissinneqarallarput

Nuummi inissiamik ikuallattoqartoq politiit nalunaaqutaq 13.26 kalerrinneqarput. Ikuallattoq inissiami Blok 8-mi pivoq.

Qatserisartut inissiaqarfinni inissianut allanut siaruaattumik ikuallangaatsiartumik akunnermi ataatsimi qamisaareerlutik ikuallattoq qamippaat. Ikuallattoqarnerani ajunaartoqanngilaq, inuilli marluk Dronning Ingridiup Napparsimamvissuanukaanneqarput.

Namminersorlutik Oqartussat Blok 8-mik piginnittut inissiaateqarfianik ingerlatsisup, INI A/S-ip oqarnera naapertorlugu inissiat arfineq-marluk ikuallattoqarneranut atatillugu ajoquserneqarput. Inissiamik attartortut taamaammat Hotel Nordbomut Ini A/S-imit inissinneqarallarput.

AAMMA ATUARUK Nuummi ikuallattoq qaminneqartoq: Inuit marluk napparsimmavimmut unitsinneqarput

Inuit qanoq amerlatigisut inissinneqarallarnersut Ini A/S-ip paasissutissiissutigisinnaanngilaa.

Tamanna Ini A/S-imi sullitanut pisortap, Arne Lyberth Petersenip oqaatigaa.

- Tassani ineqartut inissiani arfineq-marlunniittut ippassaq sukkanerpaamik inissarsiuukkallarnikuuagut. Taakkulu maannakkut suli tassa inissisimaffiniipput taakani.

Inissiani arfineq-marlunni attartortut pingasuinnaat sillimasernikuusimasut taassuma aamma nassuiaatigaa.

Inissiamik attartortut inigisaminnut qaqugu uteqqissinnaanissartik naatsorsuutigisinnaaneraat, Arne Lyberth Petersenip oqaatigisinnaanngilaa.

- Taanna maannakkumut assut oqaatigiuminaatsilaarparput una misissuineq ingerlanneqartoq ullumikkut, taanna paasilluaqqaalaariarlugu qanorlu suliassaatigissanersoq. Taassuma kingorna aatsaat oqaatigisinnaassavarput, sullitanut pisortaq oqarpoq.

Politiit qatserisartut peqatigalugit inissiap ikuallanneranut pissutaasoq misissuiffigaat, ikuallattoqarneranilu pinerluttoqarsimarpasinngilaq. Ajutoornikkut ikuallattoqarnera pineqartoq, politiit KNR-imut oqarput.

Inissiami ajutoornikkut ikuallattoqalernera pillugu politiit annerusumik oqaaseqarusunngillat.