Nuummiut Naalakkersuisooqatigiilersut pillugit: Tupaallannarpoq pakatsinalaarlunilu
Tamanna pillugu Nuummi innuttaasut isumaanik tusarniaavugut, inuit ilaasa tupaallaatigaat inuillu ilaasa pakatsissutigaat.
Bernada Sigurdsen, 29-nik ukiulik Inuit Ataqatigiit Siumullu naalakkersuisooqatigiilersut tusaramigit qanoq innersoq KNR-imiit aperaarput?
Tupannarpoq, naatsorsuutiginngikkaluarakku Siumut isissasoq, taanna oqarpoq.
Pakatsivit?
- Ija pakatsinalaarpoq, Siumut naalakkersuisuujuaannaramik, naatsorsuutiginngikkaluarakku isernissaa.
Uranimut tunngatillugu allannguisoqaqqissagaluarpat, taava innuttaasut taasitinneqarneratigut taanna aalajangiiffigineqassasoq Siumup oqaatigaa, tamanna qanoq isumaqarfigaajuk?
- Malinnaannginnama kingullertigut neriunnaraluarpoq innuttaasut malillugit aalajangiisoqarumaartoq.
AAMMA ATUARUK Ataatsimut isigalugu: Naalakkersuisunut ilaasortat nutaat aaku
Kalaallit oqaasiisa salliunneqarnerulernissaat aamma anguniagaraat, qanoq isumaqarfigaajuk?
- Torrappoq ilami kalaallit nunaanniikkatta kalaallit oqaasiisa attatiinnarniissaa atorluaqqunaqaaq, Bernada Sigurdsen oqarpoq.
Avgo Nuko, 49-nik ukiulik
Inuit Ataqatigiit Siumullu naalakkersuisooqatigiilersut tusarakkit qanoq ippit?
- Qisuariarpunga soorunami, marlullutik isumaat assigiinngitsorujussuupput. Eqqarsarpungaluunniit Siumut naalakkersuisooqataalinngikkunik allaannginnami qinersisoqartariaqassasoq, taamaammallu naalakkersuisunngortut, tassa taamatut ilimagaara, Avgo Nuko oqarpoq.
- Qinersiviup naanissaata tungaanut ataannarnissaa ilimaginngilakka isumaat assigiinngingaarmata.
- Naleqqakkunnut qanoq isumalluarnikuutiginerput eqqasaatigalugu imminnummi qanitsuararsuugamik aallaqqaataaninngaaniit, suleqatigiinnerallu ukioq ataasinnguinnalersoq neriorsuutaat atuukkunnaariikatappoq. Inuit Ataqatigiit Siumullu isumaat suli imminnut ungasinnerungaartut, ilimaginngilluinnarpara ukiuni pingasunik tulliuttunik ataannarnissaat.
Uranimut tunngatillugu allannguisoqaqqissagaluarpat, taava innuttaasut taasitinneqarneratigut taanna aalajangiiffigineqassasoq Siumup oqaatigaa, tamanna qanoq isumaqarfigaajuk?
- Uanga isumaqarpunga Siumukkut naalakkersuisunngorniaannarlutik anngaasut, allamik naamik.
AAMMA ATUARUK Ataatsimut isigalugu: Naalakkersuisut nutaat uku sulissutiginiarpaat
Kalaallit oqaasiisa salliunneqarnerulernissaat aamma anguniagaraat, qanoq isumaqarfigaajuk?
- Taanna torrallataasutut isumaqarfigaara, sumiluunniit suli amerlaqaagut qallunaat oqaasiinut pikkoriffeqanngitsuusugut, naalakkersuisoqarfimmi inatsisartoqarfimmilu arlaannik paasissutissanik pigaangatta amerlanerpaat qallunaatut, ilaatigut ujaaseqqeqqaartariaqartarluta kalaallisut allaqqasunik aatsaat nassaartarpugut, ullumikkut suli taamaattoqartarpoq. Taamaammat kalaallit oqaasiisa salliunneqarnissaat assorujussuaq iluareqaara.
Aalisarneq pillugu inatsisissaq inuiaqatigiit susassaqartullu qanimut suleqatigalugit sulineq nanginneqassaaq naammassineqarlunilu, illit taanna qanoq paasiviuk?
- Uanga imatut paasivara aalisartut suleqatigilluinnarneratigu tamanna naammassineqartussaq. Imatuunngitsoq inatsisartu naalakkersusullut kisimiillutik suliarissagaat. Taanna isumalluaalersitsivoq aalisartut suleqatigeqqissaarlugit naammassineqarumaartoq, Avgo Nukoq KNR-imut oqarpoq.
Vilhelmine Berglund, 60-inik ukiulik.
Inuit Ataqatigiit Siumullu naalakkersuisooqatigiilersut tusarakkit qanoq ippit?
- Aasiinaasiit tassa ilaa allannguisoqarpoq sianiginngilarput, takuleriallarparput SIumukkut IA-lu suleqatigiilersunngooq. Soorunami tupannarpoq sianiginngisatsinnik taamaalisoqariasaartoq.
Uranimut tunngatillugu allannguisoqaqqissagaluarpat, taava innuttaasut taasitinneqarneratigut taanna aalajangiiffigineqassasoq Siumup oqaatigaa, tamanna qanoq isumaqarfigaajuk?
- Uanga isumaqarpunga inuiaqatigiit tusaaneqassasut immaqa amerlanerit akerliupput, tassunga kujataani uranimut pisoq. Immaqa tassa allannguisoqalerpoq, tassa uranimik piaasoqalerpoq, naluara.
AAMMA ATUARUK Naleqqap siulittaasua IA-kkunnik suleqateqarneq pillugu: Qanikkunnaariartornikuugatta
Siumut Inuit Ataqatigiillu qinersiviup naanissaanut ataannarniarlutik neriorsuipput, qanoq illit isumaqarpit?
- Tassaqajaasiit immaqa ukiut pingasut ingerlaneranni allannguissapput. Kina suleqatiginiarnerlugu kina suleqatigiumannginnerlugu immaqa aamma allannguissapput. Uanga isumaqaraluarama qinikkat ukiut sisamat ataannartussat. Kisianni tassa takutippaat ippassaq aamma allannguisoqariataartoq.
Kalaallit oqaasiisa salliunneqarnerulernissaat aamma anguniagaraat, qanoq isumaqarfigaajuk?
- Soorlu malunnarpallaanngitsoq taanna Kalaallit oqaasii siulliutinneqassasut, massakkut siunniunneqarnerat upperiniarsarissavara, tassa taanna nalunartoq, Vilhelmine Berglund oqarpoq.
