EU-p russit drone-niliortarnerat killilersimaarniaraa

Ruslandimut pillaatitut iliuutsit qulingiluassaata EU-mi akuersissutigineqarneratigut, Ruslandip Ukrainemi iliuuseqarsinnaassusia killilersimaarniarneqarpoq.

Danmarkimi nunanut allanut tunngasunut ministeriugallartoq Jeppe Kofod oqarpoq, nunat EU-mut ilaasortaasut Ruslandimut pillaatitut iliuusissat suli isumaqatigiinniutigaat, ullumilu ataasinngornermi aqaguluunniit marlunngornermi isumaqatigiissusiortoqarsinnaaanissaa neriuutigineqartoq.

- Putinimut tatisimmannittuarallarnissaq pingaartuuvoq. Taamaattumik pillaatitut iliuusissat qulingiluassaat imartoorujussuussaaq. Ruslandip Ukrainemi iliuuseqarsinnaassusia taamaaliornikkut killilersimaarniarneqarpoq, Jeppe Kofod oqarpoq.

AAMMA ATUARUK Iranimut pillaatitut nutaat EU-mi akuersissutiginiaraat

Pillaatitut iliuusissatut siunnersuut akuersissutigineqarpat, Ruslandip timmisartuaqqanik ungasianit aqunneqarsinnaasunik sanaartorsinnaanera ilaatigut eqqorneqassaaq, Ruslandimi aatsitassarsiornermi aningaasaliinerit killilersimaarniarneqarlutik, inuillu ataasiakkaat aamma eqqorniarneqarlutik, inatsisilerinermilu sullissiviit aamma eqqorniarneqarlutik.

- Timmisartuaqqat inuttaqanngitsut Ukrainemut saassuseqattaarnermi atorneqartarput, sapaatillu akunnerisa kingulliit ingerlanerani russit Ukrainemut sakkortoorujussuarmik sorsupput, Ukrainimi innuttaasut innuttaasunillu sullissiviit, soorlu kiassarneq, sarfalersuineq imeqarnerlu eqqorneqartarlutik.

- Tassa Ruslandip Ukrainemi sorsunnermi iliuuserisinnaasai sutigut tamatigut killilersimaarniarparput. Tassa anguniagarput, Jeppe Kofod oqarpoq.

Ruslandimut pillaatitut iliuutsit nutaat, EU-mi nunat nunanut allanut tunngasunut ministeriisa ataasinngornermi ullaakkut akuersissutigissagaat, EU-p nunanut allanut tunngasuni qullersaata Josep Borrellip neriuutigigaluarpaa. Taamali pisoqanngilaq, isumaqatigiinniarnerillu ataasinngornermi taamaammat nanginneqarlutik.