Omikronip nunarsuarmi tamarmi tunillatsissimasut aatsaat taama amerlatigitikkai

Sukkasuumik tuniluuttoqangaatsiarnera omikronip nunatsinnut anngussimaneranik takussutissaqartoq, nakorsaaneq, Henrik L. Hansen oqarpoq.

Omikron nunarsuarmi tamarmi tunillatsissimasut aatsaat taama amerlatigeqattaarnerannut pissutaavoq.

Cororonap allannguutaanik omikronimik tunillatsittut aatsaat taama amerlatigisut Frankrigimi, Tuluit Nunaani Australimilu marlunngornermi paasineqarput.

Tunillatsittut taama amerlatiginerannut pissutaanerpaavoq, coronap allannguutaa Omikron, nutaarsiassaqartitsivik AFP taama allaaserisaqarpoq.

AAMMA ATUARUK Corona pillugu ullumikkut kisitsisit: Tunillatsissimasut nutaat 270-it ippassarmit paasineqartut

Tuluit Nunaani ullup unnuallu ataatsip ingerlanerani siullermeerluni inuit 200.000-it sinnerlugit coronamik tunillatsittut marlunngornermi paasineqarput, Australiami 500.000-ngajaat tunillatsillutik, kiisalu Frankrigimi inuit 270.000-it sinnerlugit tunillatsipput.

Amerikami aamma ullup unnuallu ingerlanerinnaani nunarsuarmi tamarmi tunillatsittut amerlanerpaartaat anguneqarput, tassa inuit 1.080.211-it ataasinngornermi tunillatsissimasut paasineqarmata.

Kisitsisit ikinnerusinnaanissaat naatsorsuutigineqarpoq, sapaatit akunnerata naanerani misissortinerit kingusissukkut akissutisisarmata.

Coronap allannguutaanik omikronimik nunarsuarmi tamani tunillatsisimasut napparsimmavinnut unitsinneqartartut ikinnerupput aamma taassuminnga toqquteqartut ikinnerullutik, taamaattumillu coronap allannguutaata sakkukinnerusumik napparsimalissutaasinnera arlalinnit neriuutigineqarpoq.

Taamaattorli Naalagaaffiit Peqatigiit peqqinnissakkut suleqatigiiffiata WHO-p coronap allannguutaata Omikronip inuiaqatigiinnut siaruaannisaa aarlerisaarutigaa.

Nunarsuarmi tamarmi tunillatsittut amerligaluttuinnarnerat ilutigalugu coronap allannguutaanik nutaanik ulorianarnerusunillu takkuttoqarsinnaammat.

/ritzau/AFP/