Oscarimi qullersat mamiatsassimasut isassisoqarnera sapaatit akunneri arlaqanngitsut qaangiuppata qisuariaateqarfiginiaraat

Will Smithip Oscarimik nersornaasiisoqarnerani isassinera pillugu misissuineq sapaatinik akunnernik arlalinnik sivisussuseqassaaq.

Oscarimik nersornaasiinermi qullersat ilaasortaminnut allakkami taama paasissutissiipput.

Amerikamiut aliikkusersuinermi atuagassiaat, The Hollywood Reporter taama allappoq.

Will Smithip iliusaa nersornaasiinermi nalliuttorsiornissamit “malunniuteqarnerusoq” pillugu ”aalassassimaarlutillu mamiatsassimallutik” Oscarimi siulittaasoq, David Rubin pisortaanerlu Dawn Hudson aamma oqarput.

Taamalu pissusilersuuteqarneq ”akuersaarneqarsinnaananilu innarliinerusoq” aamma oqaatigaat.

Oscarimik arsaarneqassava?

Taakku Smithip isassineranut qisuariaateqarlutik ”naleqquttumik” iliuuseqarniarsarissallutik nalunaarutigaat. Naleqquttumilli iliuuseqarneq qanoq ilaqarnersoq itinerusumik oqaatiginngilaat.

Will Smithip quisaarisartumik Chris Rockimik isasseqqammernermini Oscarinnattaavanik arsaarneqarnissaa arlalinnit piumasarineqarpoq. Tamannali periarfissaanersoq allassimanngilaq.

AAMMA ATUARUK LA-mi politiit Oscarinik nersornaasiinermi nakuusertoqarneranik misissuissanngitsut

Will Smith nersornaasiisoqarnerani isiginnaagassiami “King Richard”-imi inuttaanini pillugu siullermeertumik Oscarinnappoq.

Chris Rockip Will Smithip nuliata Jada Pinkett Smithip qapeqqanera pillugu takutitsisarfimmit quiasaaruteqareernerata kingorna Smithip Rock isappaa.

Isassinera assuarineqareersoq

Will Smithip nulia amerluummik alopeciamik taaneqartartumik nappaateqarnini pissutigalugu nujaqanngilaq.

- Jada, asavakkit. ”G.I. Jane 2”, takunissaanut qilanaarpunga, Chris Rock takutitsisarfimmit Jada Pinkett Smithimut oqarpoq.

Quiasaaruteqarnera filmimut pissanganartuliamut ”G.I. Jane”-mut 1997-imeersumut tunngassuteqarpoq. Isiginnaagassiami tassani arnaq inuttaasoq sakkutuutut saggaasunik nujaqarpoq.

Oscarimik nersornaasiissartut Will Smithip iliuusai assuarereerpai, suliarlu misissuiffigineqarumaartoq nalunaarutigalugu.

Oscar akademiimit qullersat marluk Smithip isassinera suli assuarigitsik allakkami nalunaarutigaat.