Peqqinnissaqarfik pillugu maalaarutit: Ukiut tallimat ingerlaneranni marloriaatinngortut
Peqqinnissaqarfik pillugu naammagittaalliuuteqartut ukioq manna maannamut 157-iupput. Allatulluunniit oqaatigalugu, peqqinnissaqarfik pillugu naammagittaalliuutit amerliartorput, naammagittaalliuutimmi siorna katillutik 121-ummata. Nunatta nakorsaaneqarfiani peqqinnissaq pillugu siunnersorti Louise L. Faber taama ilisimatitsivoq.
- Nakorsiat arlaannik naammagittaalliuuteqarnerannik ersersitsisuusut isumaqarpunga. Maalaarutit tusaaniartariaqarpavut, alloriaqqinnissamullu atorlugit. Iliuuserisassanut tikkuussisuussapput, sullissinermi suut pitsaanerusinnaanersut paasisaqarfigalugu. Nunatta nakorsaaneqarfiani peqqinnissaq pillugu siunnersorti Louise L. Faber oqarpoq.
Peqqinnissakkut sullinneqarneq pillugu maalaarutit amerlanerannut suut peqqutaanersut taassuma erseqqissumik oqaatigisinnaanngilaa:
- Peqqinnissaqarfiup sullissinerata inuiaqatigiinni naammagineqannginneranik immaqa ersersitsivoq. Peqqinnissaqarfiummi unammilligassaqangaatsiarnera tusagassiuutini sammineqangaatsiarnikuuvoq. Katsorsaanermi arlaatigut aamma kukkusoqarsimasinnaavoq, innuttaasulluunniit maalaaruteqarsinnaanertik atorluarnerulersimasinnaavaat, Louise L. Faber oqarpoq.
- Naluarpulli sunarpiaanersoq, misissornikuunngilarput, imaassinnaasoq tamakku tamaasa ataatsimut katillugit ajornartorsiuteqartoqartoq, taanna oqarpoq.
Peqqinnissakkut sullinneqarneq pillugu maalaarutit massakkutut amerliartortigissappata ukiut tallimat matuma siornatigumut naleqqiullugit marloriaatinngussapput.
Kisitsisit aajuku:
- 2022 jan-sep: Maalaarutit 157-it
- 2021: Maalaarutit 121-t
- 2020: Maalaarutit 119-it
- 2019: Maalaarutit 121-t
- 2018: Maalaarutit 94-it
- 2017: Maalaarutit 86-it
Danmarkimit ikiuiartortoqassaaq
Peqqinnissakkut sullinneqarneq pillugu maalaarutit amerlanerat Nunatta Nakorsaaneqarfianut ilaatigut artukkiisimavoq, maannali aaqqiissuteqartoqalerpoq:
- Sulisunik, maalaarutinik suliaqartussanik, amerlanerusunik atorfinitsinikuuvugut. Taassuma saniatigut peqqinnissaq pillugu maalaaruteqartarnermut Danmarkimi aqutsisoqarfimmit sulisunit qujanartumik ikiorneqarsinnaasimavugut, taakkualu qaammatini pingasuni ikiussavaatigut, Louise L. Faber oqarpoq, nangipporlu:
- Kisianni tassa unammilligassaqarpugut, nunattami nakorsaaneqarfiani allanik aamma suliassaqarpugut, maalaarutimmi kisiisa suliarineq ajorpagut. Pissutsilli massakkutut iinnassappata suliassat nammassinnaavagut, Louise L. Faber KNR-imut oqarpoq.
Suleqatigiinnissaq pisariaqartinneqarpoq
Peqqinnissaqarfiup sullissinera pillugu naammagittaalliuutit Nunatta Nakorsaaneqarfiata tigusartagai Kalaallit Nunaanni suliarineqaqqaartarput, kingorna taava nakorsiat pillugit Danmarkimi aqutsisoqarfimmut taava ingerlateqqqinneqartarput, paasisimasalimmit tassani aalajangiiffigineqartarlutik.
Peqqinnissakkut sullinneqarneq pillugu maalaarutit nunatsinni suliarineqarsinnaanersut Louise L. Faber aperaarput:
- Naagga. Maalaarut immikkut ilisimasalimmit nalilerneqartussaavoq, tamakkualu pillugit nakorsanik immikkut ilisimasalinnik peqanngilagut, nakorsarlu ingerlatsinermut atorneqartariaqalissappat peqqinnissaqarfimmi assigiinngitsutigut sulisunik amigaateqarnerput ajorneruliinnassaaq.
- Taamaattumik maalaarutinik siunissami qaninnerusumi suliaqarsinnaalernissarput ilimanarpallaanngilaq, Louise L. Faber peqqinnissaq pillugu nunatta nakorsaaneqarfiani siunnersorti oqarpoq.
