Timmisartuussinerit equsooqattaarmata napparsimasut aallarnaveertut
Aasaanerani timmisartuussinermi ajornartoortoqarnera takornariat nunatsinnilu angalasut akornanni puffaammissutaavoq.
Napparsimasut peqqinnissaqarfimmilu sulisut timmisartut ulikkaaqqanerat timmisartuussinissaraluillu taamaatiinnarneqarnerat aamma malugilaavissorpaat. Peqqinnissaqarfimmi pisortaq Tina Amondsen KNR-imut ima oqarpoq:
- Peqqinnissaqarfimmi sulisut timmisartuussinermi unammillernartoqarnerani immikkut ittumik suliassaqarnerungaatsiarnerat isertuussassaanngilaq.
Peqqinnissaqarfiup kalaallit napparsimasut aasaanerani timmisartuussinerup kipiluttunartoqangaatsiarsimaneranit eqqugaanerannik ajuusaaruteqarnini tusagassiuutinut nalunaarutigeqqammerpaa. Napparsimasunik angallassiniarneq siornatigut taama ilungersunarnikuutigisimanngisaannartoq, Tina Amondsenip KNR-imut oqaatigaa.
AAMMA ATUARUK Air Greenlandip kanngittut kipiluttunartorsiorfigai
Air Greenlandip timmisartuisa ulikkaaqqanerat, timmisartut teknikkikkut ajutooqattaarnerat sineriammilu pujoqattaarnera peqqutaallutik napparsimasut ilaat ornigunnissaminnut piffissaliussaq eqqorlugu takkussinnaasimannginnamik katsorsartinnissaat kinguartinneqartariaqarsimapput.
Napparsimasut allat pingaartumik Københavnimi katsorsartereernerminni utaqqisariaqarput.
- Napparsimasut ilaat uteqqinnissaminnut sapaatit akunnerini marlunni utaqqisariaqarsimapput. Tamanna innuttaasunut katsorsartikkiartorlutik pisariaqanngitsumik taama sivisutigisumik aallaqqasariaqarsimasunut soorunami imaannaasimanngilaq, Tina Amondsen oqarpoq.
Taamaammat peqqinnissaqarfik napparsimasunik Københavnimi Peqqissartut Illuanniititsinermut taavalu Peqqissartut Illuata ulikkaaqqanera peqqutaalluni akunnittarfinniititsinermut immikkut aningaasartuuteqartariaqarsimavoq.
Peqqinnissaqarfimmi sulisut angalanerat sivisusoq
Nunatsinnilu peqqissaaviit ilaanni uninngasut aamma kanngipput. Avannaanilu peqqissaaviit ulikkaaqqanerat peqqutaalluni naartusunik uninngasuuteqarsinnaasimanngillat.
Tamanna ingammik uninngareersunik Nuuliaassisoqarsinnaasimannginneranik peqquteqartoq, peqqinnissaqarfimmi pisortaq oqarpoq.
Timmisartuussinissaraluanik taamaatitsisaqattaarnerit timmisartullu ulikkaaqqanerat peqqutaallutik peqqinnissaqarfimmi sulisut ilarpaalui pilersaarutit malillugit suliartorsinnaasimanngillat.
Aasaq manna timmisartuussinermi ajornartoornerit
Timmisartuussassat tuusintilikkaat nunatsinni sumiiffinni assigiinngitsuni aasaq manna kanngipput. Ingammillu Kangerlussuaq ilungersuaffiuvoq.
Peqqutaasut: Pujoqattaarlunilu silarlorqattaarnera timmisartullu arlallit teknikkikkut ajutoornerat.
Tamatuma saniatigut timmisartut amerlasuut ingammik timmisartoq Danmarkiliartartoq amerlasooriarlutik ulikkaaqqapput. Tamanna coronap ukiuni kingullerni marlunni tuniluunnerani angalanissamut killilersuisoqareernerani ingammik nunatsinnut nunatsinniillu angalarusuttorpassuaqarneranik peqquteqarpoq.
Ilaasussallu ilarpassui ingammik Ilulissani Kangerlussuarmilu unnuiffissaqannginnerat aamma ajornartorsiortitseriaannarpoq.
Timmisartuussinermilu ajornartoornerit napparsimasut nunatsinniit Danmarkimut Danmarkimiillu nunatsinnut angalanissaannut aamma peqqinnissaqarfimmi sulisut angalanerannut eqquinerlupput.
Assersuutigalugu nakorsaq Danmarkimiit Island Ilulissallu aqqusaarlugit Kujtaanukarnermini timmisartut ulikkaaqqanerat peqqutaalluni sisamariarluni unnuisariaqarsimavoq.
- Aasaq manna taartaajartorlutik suliartortut pisariaqartingaatsiarpagut. Taakkulu ilaat aamma angalangaatsiaqqaarlutik apuupput, Tina Amondsen oqarpoq.
Peqqinnissaqarfiup napparsimasunik timmisartuussissutaa ”King Air” teknikkikkut sisamariarluni aasaq manna aamma ajutoorpoq. Tamannalu peqqinnissaqarfiup angallassinermi ataqatigiissaarisuinut aamma kipiluttunarsimavoq.
Timmisartuni inissat pillugit isumaqatigiinniartut
Tina Amondsenip oqarnera naapertorlugu peqqinnissaqarfik Air Greenlandilu napparsimasunik timmisartuni inissaqartitsinermut isumaqatigiissuteqanngillat.
Aatsaat pisariaqaleraangat napparsimasut angalanissaannut inniminniisoqartarpoq.
Peqqissutsimut Aqutsisoqarfilli Air Grrenlandilu allatut aaqqiissuteqarnissartik oqaloqatigiissutigileruttoraat, Tina Amondsen oqarpoq.
- Inissanik aamma angallassiffiunerpaami pisariaqartitsiuaannartugut erseqqissaatigaarput. Inissallu qaammatinik marlunnik sioqqutsilluta inniminnersimasavut kikkunnit atorneqassanersut nalunaarutigereersinnaasanngikkipput ilanngullugu erseqqissaatigaarput. Aappaagu pitsaanerusumik periarfissaqarnissatsinnik qulakkeerutaasussamik aaqqiissuteqarnissarput Air Greenlandilu oqaloqatigiissutigileruttorparput.
AAMMA ATUARUK Ilaasussat kanngittut ingerlaqqissinnaalersut
Peqqissutsimut Aqutsisoqarfik Air Greenlandilu isumaqatigiinnialeruttortut, Air Greenlandip niuernermi pisortaata Henrik Søep KNR-imut allakkatigut uppernarsarpaa. Ukioq manna oktobarip aallaqqaataani isumaqatigiinnissaat naatsorsuutigineqartoq, taanna ilisimatitsivoq.
- Tamatumunnga atatillugu kinguneqartussamik oqaloqatigiippugut, suli eqaannerusumik aaqqiissuteqarnissatsinnut periarfissat arlallit eqqartorlugit, Henrik Søe oqarpoq nangillunilu:
- Peqqinnissaqarfillu pisariaqartitsigaangat napparsimasut ileqqutsitut sapinngisatsinnik inissarsiuuttarpagut. Peruluttunut aamma inissaqartitsiuaannarpugut – aamma timmisartut ulikkaaqqagaluaraangataluunniit.
Napparsimasut 20-nit ikinnerunngitsut Københavnimiit nunatsinnut ulluni makkunani timmisartuunneqarput. Tassa Københavnimi Peqqissartut Illuat taamaalilluni ulikkaaqqajunnaarpoq.
