Pilersuisoq neqit akitsuutaarutilerneranni: Akitsuutilinnik ukiumut pisereerpugut
Inatsisartut neqit nunatta avataanit eqqussukkat, savat savaaqqallu neqaat minillugit, ukiortaamit akitsuutaarutissasut aalajangerput.
Demokraatinit Jens-Frederik Nielsen, siunnersuuteqartuuvoq. Taassuma nersussuit neqaat aserortikkat pisisartumut kilomut koruuninik qulinik akikinnerulersinnaanerat akitsuummik atorunnaarsitsinermi naatsorsuutigaa.
AAMMA ATUARUK Demokraatit: Neqinut akitsuutit peerneqarlik
Ukiumut peqqumaatersereersoq
Tamannali Pilersuisumi pisisartut akikinnerusumik neqisisalernissaannik kinguneqassanersoq suli qularnarpoq. Tassami Pilersuisup pisiniarfii arlallit, soorlu sikusartumiittut, ukiumut peqqumaatissanik pajuttorneqareertarput. Neqillu ukiumut peqqumaatit eqqussornerannut akitsuutaat akilerneqareernikuusoq, Pilersuisup pisortaa KNR-mut allappoq.
- Pilersuisup taamaattumik Namminersorlutik Oqartussat attaveqarfiginikuuaat, akitsuutillu akilerikkat utertinneqarsinnaanerat pillugu maannakkut oqaloqatigiippugut. Akitsuutit akileriikkagut utertinneqarpata neqit soorunami 2023-mi januaarip aallaqqaataannit akikillissavagut, Brian Weuge Chemnitz KNR-mut allappoq.
Taassuma Namminersorlutik Oqartussanut kissaatertik itigartinneqassagaluarpat, pisisartut neqisiassaasa akii nikissanersut nikissanginnersulluunniit oqaloqatigiinnertik, inaarutaasumillu isumaqatigiinnissartik sioqqullugit akiumanngilaa.
- Piginnittut suli oqaloqatigaagut, taamaattumik apeqqutit maannakkut akisinnaanngilara, Brian Weuge Chemnitz allappoq.
Brugseni aamma nalornisoq
Pilersuisup neqiutaasa akikillinissaat qularnartut kisiartarinngilaat. Brugsenimi tuniniaanermut pisortap, Jes Nyborgip, neqit akitsuutaarukkaluartut akikillinissaat suli qularalugu KNR-mut siusinnerusukkut oqarpoq.
- Nersussuit neqaasa aserortikkat pisiatta 99,9 procentii Danmarkimeersuupput. Taamaattumik nioqqutinut taakkununnga Danmarkimi akit apeqqutaalluinnassapput, Jes Nyborg oqarpoq.
AAMMA ATUARUK Brugseni neqit akitsuutaarunneranni: Pisisartut malugissaneraat qularnarpoq
Tassa Brugsenip nioqqutissanik pisiniarfigisartagaasa akigititaat nunatsinni pisisartut akikinnerusumik neqisisinnaalernissaannut aalajangiisuussapput. Brugsenip pisiniarfigisartagaasa akit akitsorpatigit Brugsenimut pisiniartartut akikinnerusumik neqisisinnaanissaat qularnarsissaaq.
