WWF: Europami imissaaleqisoqaleriartuinnassaaq
Europami imissaaleqineq ajornartorsiutaanerujartuinnassaaq.
Pinngortitaq pillugu nunarsuaq tamakkerlugu suliniaqatigiiffik Verdensnaturfonden (WWF) taama naliliivoq. Europami sumiiffinni amerlasuuni panernersuaqarlunilu erngup ammut killingata nalinginnaasumik appasinnerunissaa Verdensnaturfondenip siulittuutigaa.
- Europami innuttaasut 17 procentiisa missaat imissaaleqinermit 2050-imi toqqaannartumik eqqorneqassangatinneqartut, suliniaqatigiiffiup qullersaa Gustaf Lind Sverigemeersoq oqarpoq.
AAMMA ATUARUK Europami nunat kiarujussuarnerata kingunerisaanik pinngortitami ikuallattoqarnera unammillissutigigaat
Spaniap kujasissortaa, Grækenland Tyrkialu eqqorneqarnerpaassangatinneqarput.
Tamaani innuttaasut 75 procentii tikillugit siunissami imissaaleqisaleratarsinnaasut, misissuinerup takutippaa.
Verdensnaturfondenimi Water Risk Filterimi paasissutissat matumani tunuliaqutaapput. Silap pissusianut paasissutissat siunissamut isigisut aallaavigalugit innuttaasut aningaasarsiornerlu pillugit eqqoriaasoqarpoq, Naalagaaffiit Peqatigiit matumani aamma peqataallutik.
