Pisortani sulisunut isumaqatigiissutit ajornannginnerulersinneqassasut
Naalakkersuisuusimasut Isumaqatigiissutinut isumalioqatigiissitamik isumaqatigiissuterpassuarnik assigiinngitsunik Nunatsinni pisortani sulisunut sinaakkutiliisunik ajornaannerulersitsisussamik 2020-mi pilersitsipput.
Isumalioqatigiissitap ukiuni marlungajanni suliaqareerluni isumaliutissiissut piareerpaa, tassanngalu pisortat isumaqatigiinniartarnermut aaqqissuussinerinik pitsanngorsitsinissamut innersuussutit 32-upput.
AAMMA ATUARUK Isumaqatigiissutit ikilisarneqarnissaat naleqqussarneqarneqarnissaallu Isumaqatigiissutinut Isumalioqatigiissitap suliassaraa
Arlallit isumaqatigiinniartartut
Isumalioqatigiissitap suliatigut peqatigiiffiit akornanni ataatsimoorussanik isumaqatigiinniaqatigiittarfeqalernissaa ilaatigut innersuussutigaa. Suliatigut peqatigiiffiit ataatsimoortumik isumaqatigiinninniarnissaat eqqarsaatigineqarpoq, isumaqatigiissutit taamaalillutik assigiissaarnerulerlutillu isumaqatigiinniarnerit ikinnerulissapput.
Marta Labansen, Isumaqatigiissutinut isumalioqatigiissitap siulittaasua taama nassuiaavoq:
- Kattuffiit massakkut atuuttuusut immikkorluinnaq isumaqatigiinniartarneri qimallugit, kaammattorneqarput aammalu namminneq taanna suleqataaffigerusuppaat, peqatigiillutik, kattullutik isumaqatigiinniarnerit ingerlattalersinnaanissaat.
Pisortani isumaqatigiissuteqartnermi aaqqissuussineq
Pisortani isumaqatigiissuteqartarnermi aaqqissuussineq suliffeqarnermit isumaqatigiinniartut akornanni isumaqatigiissutigineqartunit naleqqussarneqassapput.
Suliffeqarnermit isumaqatigiinniartut peqatigiiffiupput sulisitsisut (Namminersorlutik Oqartussat aamma kommunit) sulisullu (sulisut peqatigiiffii assigiinngitsut 15-it) peqatigiiffigisaat.
Isumaqatigiissutit pingaarnerit maanna 18-iupput, isumaqatigiissutit 47-t inuillu ataasiakkaat isumaqatigiissutaat 200-it, taakkulu tamakkiisumik atorfinnut 11.400-inut atuupput.
Ataatsimoortumik isumaqatigiinniaqatigiittarfik assersuutigalugu perorsaanermi sulisunut ukkataqartoq pilersinneqarsinnaavoq.
Uani sulinermi eqimattat peqatigiiffinnit assigiinngitsuneersut ilaapput, taakkuli kommunimi suliffiat amerlanertigut assigiittarpoq. Taamaammat uani isumaqatigiinniarnermi ataasiakkaarinani ataatsimoortinneqarneranni aamma isumalluutit sipaarutigineqarsinnaapput.
Isumaqatigiinniartartoq arlaannaanulluunniit atassuteqanngitsoq
Isumalioqatigiissitap islandimit isumassarsiaqarnermi kingunerisaanik isumaqatigiinniarnermi isumaqatigiittoqarsinnaanngikkaanngat arlaannut atassuteqanngitsumik isumaqatigiissitsiniartoqarnissaata pisariaqarnerani ilaatigut atuuttartussamik pilersitsisoqarnissaa siunnersuutigaa.
Katersuivik nunami tamarmi isumaqatigiissitsiniaasartoqarfimmik taaguuteqartoq suliffeqarnermi illuatungerisat innersuussuteqarneranit Naalakkersuisunit toqqarneqartassaaq.
Nunami tamarmi isumaqatigiissitsiniaasartoqarfik inatsisitigut pilersinneqassaaq nunattalu karsianit aningaasalersorneqassalluni.
Danskit suliatigut peqatigiiffii nunatsinniittariaqartut
Isumalioqatigiissitap pingajuattut innersuussutigaa suliatigut peqatigiiffiit nunatsinni pisortat isumaqatigiinniartarneranut aaqqissuussinermi ilaasut aamma nunatsinni nassaassaasariaqartut.
Suliatigut peqatigiiffiit inuit ataasiakkaat peqatigiiffigisaat nunatsinniittarnerat ilaatiguinnaavoq.
Malittarisassat ullumikkutut itsillugit peqatigiiffiit nunatsinniinnissaannik pinngitsaalineqarsinnaanngillat, kisianni suliatigut peqatigiiffiit nunatsinni isumaqatigiissutinik isumaqatiginninniartartut nunatsinniinnissaminnik sulissuteqartariaqartut isumalioqatigiissitap innersuussutigaa.
Unnuinnarlugu atuutsilerneqassanngitsut
Isumaqatigiissutinut isumalioqatigiissitap innersuussutai ukiut tulliuttut tallimat ingerlaneranni atuutsilerneqarnissaat innersuussutigineqarpoq.
Innersuussutit ataasiakkaat erngertumik atuutilersinneqarsinnaagaluartut innersuussutit aamma isumaqatigiinniartarnermut aaqqissuussummut allannguingaatsiartussaqarpoq, taamaammat taakku atuutsilerneqarnissaanut piareersartoqangaatsiarnissaa pisariaqarpoq.
Isumaliutissiissut aallaqqaammut Naalakkersuisunut tunniunneqassaaq, taakkulu susoqarnissaa aalajangiiffigissavaat.
