Politiit: Inuusuttut qummoroortartunik heksehylinillu pinnguartut arlallit nalunaarutigineqartut

Qummoroortartunik illut akornannut aallartitsineq, tankillu eqqaani heksehylinik pinnguarneq, tassa ullup ataatsip ingerlanerani politiinut nalunaarutigineqartut ilaat.

Nuummi inuusuttut qummoroortartunik nunaannarmut illulluunniit akornannut aallartitsillutik qaartitsisaqattaarput.

- Inuusuttut najugaqarfiit inuillu akornanni qummoroortartunik milloorlutik qaartitsisaqattaartut arlaqartut nalunaartugineqarput. Ornigukkaangattali arpallutik qimaasarmata oqaloqatiginissaat iluatsikkuminaattarpoq, Kalaallit Nunaanni politiit pigaartuisa pisortaat, Palle Augustinussen KNR-imut oqarpoq.

Juullit ukiortaallu akornanni meeqqat inuusuttullu qummoroortartunik sissuernissaat pillugu politiit atuarfinnut angalaarnikuupput.

- Inuusuttut qummoroortartunik heksehyylinik pinnguarnissatik nuannarisaraat, taamaammat tamakkuninnga ulorianartumik pinnguannginnissaannik oqaaqqissaarnissaat aamma piuminaassinnaasarpoq, taanna oqarpoq.

AAMMA ATUARUK Aputeqanngitsumi isumannaatsumik ukiortaarsiornissamut siunnersuut

Taassuma oqarnera naapertorlugu  inuusuttut heksehylinik suleffeqarfiit containariinut milloortut aamma ajornartorsiutaapput.

- Suliffeqarfiit containeriinut heksehylinik milloorneq ulorianarpoq. Taakkummi heksehylinik qaartitsiviginissaannut ulorianartunik imaqarsinnaapput.

- Aamma tankip eqqaanni qummoroortartunik pinnguartut nalunaarutigineqartunut ilaapput. Taamaani qummoroortarneq ulorianartorujussuuviq, qaartoqarsinnaavormi, Palle Augustinussen oqarpoq.

Pigaartup pisortaa inuusuttunut kaammattuutissaqarpoq:

- Inuusuttunut kaammattuiinnarsinnaavunga, najugaqarfiit ajornanni ulorianartumik qaartitsisaqattaannginnissaannik, najugaqarfiilli ungasilliimillugit isumannaallisaatinillu issalerlutik qummoroortitsisarnissaat kaammattuutigerusuppara.