Politiit: Pigisasi anorimut qajannaarsorsigit
Nunatsinni politiit kajumissaarutigaat, anorersuarujussuaq Nuummi Paamiunilu pitoraammat inuit pigisaminnik isumannaarinneqqullugit, aammalu suliffeqarfiit sanaartorfiusut teqqaasoqannginnissaa pillugu isumannaarsueqqullugit.
Nuummi Paamiunilu anoraasuarsuaq pitoraappoq Arkivfoto
Allattoq Anders Dall
apriilip 21-at 2022 09:34
Nutserisoq Karline Platou
Nunatta kitaani ullumi natsimanermik sakkortungaatsiartorsuarmik anoraasuarujussuartassasoq silasiortut allapput.
DMI naapertorlugu, Nuummi ullaap tungani anori sakkortunerpaaffissaminiikkuni sekundtimut meterimut 36 - 30-llu akornanni sakkortussuseqassaaq. Taamatuttaaq DMI naapertorlugu Paamiuni anorersuarujussuaq pitoraatissasoq naatsorsuutigineqarpoq.
Facebookilu aqqutigalugu Nunatta politiivisa kajumissaarutigaat suliffeqarfiit soorlu illunik sanaartorfiit teqqaasoqannginnissaa pillugu isumannaallisaaqqullugit.
Taakku aamma allapput, innuttaasut pigisaminnik isumannaarinnittariaqartut.
DMI silassamik nalunaarumminni allapput, anoraasuarsuaq Nuummiit Paamiut tikillugu atuuttussaq ualeru kingusissukkut aatsaat qasukkariartulissasoq.
