Politiit pillugit maalaaruteqarnerit oqartussaasunit attaviitsunit suliarineqartalissapput
Politiip iliuuseqarnera imaluunniit nalinginnaasumik politiit ataatsimut maalaarutiginiarukkit - taava politiinut namminernut maalaaruteqassaatit taakkulu nammineq maalaaruteqarneq suliarissavaat.
Kalaallit Nunaanni ullumikkut pissutsit taamaapput. Kisianni inatsisissanut massakkut siunnersuummi siunissamut kissaatigineqarpoq politiit pillugit maalaarutit oqartussanit attaviitsunit suliarineqartalissasut.
Kalallit Nunaanni Politiit Peqatigiiffiata siulittaasuata Bjørn Bjerregaardip tamanna nuannaarutigaa.
Peqatigiiffimmi politiit pillugit maalaaruteqarnerit nammineq suliarinissaasa allamut nuunneqarnissaat sivisuumik kisaatigineqarpoq, tassami innnuttaasut eqqartuussisutigut isumannaannissaannut politiilu uppernartuunerinut iluaqutaassammat.
AAMMA ATUARUK Politiinik iluarsartuusseqqinneq: Suliat ingerlaarfii pisariinnerusut politimesterilu nutaamik taaguuteqalertoq
- Suliaq politiinik tapersiippat innuttaasut ima eqqarsarsinnaalluarput: 'Ajunngilarmi, politiit imminnut misissuipput, taamaattumillu pisoqaqqinngilaq”.
- Taamatut pasilliinerit pinngitsoorneqarsinnaapput siunissami attaviitsumit misissuisoqarneratigut, Bjørn Bjerregaard KNR-imut oqarpoq.
Oqartussaasut taakku politeeqarfinni allani suliaqartarput
Den Uafhængige Politiklagemyndighed (Politiit pillugit Maalaaruteqartarfik Attaviitsoq) – ulluinnarni DUP-imik taaneqartartoq – ullumikkut Danmarkimi Savalimmiunilu atuuttoq inatsisissatut siunnersuummi aamma Kalaallit Nunaannut atuutilissaaq.
Kalaallit Politiivisa annertuumik iluarsaasseqqiffiginerannut atatillugu tamanna pissaaq, taamalu Danmarkimi Savalimmiunilu politeeqarfinnut naligiissinneqalissallutik.
Grønlands Politiklagenævn (Kalaallit Nunaanni Politiinik Maalaaruteqartarnermut Aalajangiisartut) Politimesterip ataaniittut ukiut tamaasa politiinik maalaaruteqarnerit qassiunerinik naatsorsuisarput. I 2020-mi suliat qulingiluat tunniunneqarput. 2011-miilli ikiliartorsput, taamani suliat 18-iullutik.
Innuttasoq, peqatigiiffik suliffeqarfilluunniit Kalaallit Politiivisa sulineri pillugit maalaaruteqarniaraangat, taava pisortaasoq qaninneq imaluunniit politiit unnerluussisussaatitaat suleqataasut pineqartut pillugit maalaarutinik suliarinnittarput.
AAMMA ATUARUK Kalaallit Nunaanni politeeqarnerup oqaluttuarisaanerani aaqqissuusseqqinnerit annertunersaat piariingajalersoq
Politiillu akornanni suliaq tamaattoq amerlanerpaatigut nuanninngitsuusarpoq.
- Maani Kalaallit Nunaanni kikkut tamarmik imminnut nalunngillat, taamalu imminuut qanigisariillutik. Taamalu suleqatigisaq suliami killisiussallugu nuanninngisaannarpoq, Bjørn Bjerregaard oqarpoq.
Taamaaliornissarlu pisariaarutissaaq oqartussaasut attaviitsut maalaarummik suliaqartalerpata.
- Iluaqutigaa suleqatigisap suleqatigisani killiussanngimmagu imaluunniit suleqatigisaminnut sulianik ingerlatsisuussanatik, politiit peqatigiiffiata siulittaasua oqarpoq.
Det Uafhængige Politiklagemyndighed/Politiit pillugit Maalaaruteqartarfik Attaviitsoq pillugu inatsisissatut siunnersuut siorna Inatsisartunit akuerineqarpoq naatsiorsuutigineqarlunilu upernaap ingerlanerani Folketingimi akuerineqassasoq. Taamaassappat 1. januaari 2023-miit Kalaallit Nunaannut atuutilissaaq.
Danmarkimi Det Uafhængige Politiklagemyndighed/Politiit pillugit Maalaaruteqartarfik Attaviitsoq naapertorlugu oqartussaasoqarfiup taassuma suliat Kalaalit Nunaanneersut Danmarkimi suliarisassanerai, imaluunniit Kalaalit Nunaanni inunnik tamakkuninnga oqartussat taakku sinnerlugit suliaqartartussanit toqqakkanit suliarineqartassanersut suli erseqqissinngilaq.
