Putinip nunat killiit sakkortuumik illuatungilerai
Nunat killiit Ukrainemi sorsuttoqarneranut pissutaapput.
Ruslandip præsidentiata Vladimir Putinip oqalugiarnerani, utaqqineqarsimasumi, oqaasii ilaatigut taakkuupput. Putin nunanut killernut aammaarluni sakkortuumik illuatungiliivoq.
Ukraine nunanit killernit russinut qangalili illuatungiliisunngortinneqartoq, Putinip ilaatigut pasilliutigaa.
Nunani killerni nunat annerit pissaaneqarnerujartuinnarniarsarisut, Vladimir Putinip taassuma saniatigut oqaatigaa.
Putin, Ruslandimi inatsisartunut Moskvami ulloqeqqareersoq sassarpoq, inatsisartunut ilaasortat, sakkutuut naalagaat sakkutuullu tassani oqalugiarfigalugit.
Ukrainep saassunneqarneraniit ukioq ataasinngulersorlu Putin oqalugiarpoq.
Putinip russit Ukrainemik saassussinerat sakkutuut immikkut iliuuseqarnerattut taajuarsimavaa. Marlunngornermi oqalugiarami taama aamma oqaqqippoq.
Russit sakkutuui Ukrainemiittut qanoq iliuuseqartarnissaannik ingerlaavartumik nalilersuisoqartarumaartoq oqaatigineqartoq, nutaarsiassaqartitsivik Reuters allappoq.
