Puussiat tigummiveqanngitsut, milluaatit vatpindillu atorunnaarfissaat ullulerneqartoq
Puussiat plastikkit tigummiveqanngitsut niuertarfinni novembarip aallaqqaataaniit atorneqartarunnaassapput.
Milluaatit, vatpindit plastikkiusut ataasiaannarlugillu atorneqartartut aamma inerteqqutaalissasut, Nunalerinermut, Imminut Pilersornermut, Nukissiutinut Avatangsiisinullu Naalakkersuisoqarfik tusagassiuutinut nalunaarummi paasissutissiivoq.
- Puussianik plastikkinik nioqquteqarneq nunatta karsiata isaatitsissutigisarpaa.
- Tamanna puussiat plastikkit avatangiisinut akitsuuteqarnerannik pissuteqarpoq. Taamaammat puussiat plastikkit tigummiveqanngitsut tunineqaraangata nunatta karsia 3 koruuninnattarpoq.
- Aningaasaqarnermut Naalakkersuisoqarfik naapertorlugu puussianit avatangiisinut akitsuutit 11,5 millionit koruuninik siorna iluanaarutigineqarput.
- Nunatsinni pisiarfiit annersaasa, Brugsenip, KNI-p Pisiffiullu puussiat plastikkiusut ataatsimut 2,8 millionit tunivaat.
- Plastikkit pinngortitamiittut avatangiisinut peqqissutsimullu kingunerluuteqartarput. Tunisassiat ataasiaannarluni atugassat, maanna inerteqqutaalersussat imartani avatangiisitsinni sinerissatsinnilu pisarput, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Inatsisartuni suli akuerineqanngitsoq
Naalakkersuisut inerteqquteqalernissamut siunnersuut maajimi tusarniaassutigilerpaat – maannalu nalunaarusiorneqarpoq.
Inatsit naapertorlugu Naalakkersuisut nioqqutissanik Naalakkersuisut namminneq avatangiisinut ulorianartutut naliliigunik tamatumanik inerteqquteqarsinnaapput.
Tassa imaappoq Naalakkersuisut Inatsisartut avaqqullugit plastikkit inerteqqutigisinnaavaat, taamaammat plastikkinik inerteqquteqarneq naak Inatsisartuni ilaasortat suli akuersinngikkaluartut novembarip aallaqqaataanit atuutilissaaq.
AAMMA ATUARUK Naalakkersuisut vatpindinik, milluaatinik plastikkinillu puusiat tigummiveqanngitsut inerteqqutigilerniaraat
Naalakkersuisut ataasiaannarlugit atortakkat ukiumut 10,5 tonsit missaanniittut nunatsinnut eqqunneqartartut missiliorpaat.
Tamatuma saniatigut plastikkinik nioqqutissiat allat – pingaartumik puussiat plastikkit eqqorsorneqartartut 68 tonsit missaanniissangatinneqarput.
- Plastikkinut nalunaarut tunisassiat taamaattut mingutsitsiunnaarnissaannut iluaqutaassaaq, Kalistat Lund oqarpoq.
Plastikkimut inerteqquteqarniarneq sivisusoq
Plastikkit ataasiaannarlugit atorneqartussat inerteqqutigilerniarnerat sivisuvoq.
Plastikkinik atuinerup annikinnerulersinnissaanut Naalakkersuisut pilersaarusiussasut, Inatsisartut 2019-imi aalajangerpaat. Plastikkimmi ataasiaannarlugit atorneqartartut nunatsinni pinngortitamut mingutsitseqataasut misissuinernit takutinneqarpoq.
AAMMA ATUARUK Politikeri puussiat plastikit tunineqarnerat pillugu: Tupaallannaq
Taamaammat Naalakkersuisut plastikkit pillugit iliuusissatut pilersaarut 2020-mi aggustimi tusarniaassutigaat. Maannalu – ukiut marluk qaangiuttut – inerteqquteqarnissaq piareerpoq.
- Innuttaasut, niuertut neriniartarfiillu akornanni plastikkinik ajornartorsiuteqarnerup eqqumaffigineqarnerulernera misigalugu nuannerpoq, naalakkersuisoq Kalistat Lund oqarpoq.
